Bakýde Halyqaralyq Túrki akademııasynyń III otyrysy ótti

BAKÝ. QazAqparat – Búgin Bakýde Halyqaralyq Túrki akademııasy ǵylymı keńesiniń III otyrysy ótti. Shara barysynda Qyrǵyz Respýblıkasy Bilim jáne ǵylym mınıstrliginiń stats-hatshysy Japarkýl Tashıev ózi atqaryp kelgen Halyqaralyq Túrki akademııasy Ǵylymı keńesiniń tóraǵasy mindetin Ázerbaıjan ókili, ÁR bilim mınıstri D.Baıramovqa tapsyrdy, dep habarlaıdy QazAqparat.

Jıynda Akademııa basshysy ótken jyly atqarylǵan jumys týraly esep berip, 2020 jylǵa arnalǵan jumys josparyn tanystyrdy. Ǵylymı keńes músheleri 2019 jyly júzege asyrylǵan ıgi isterge joǵary baǵa berip, 2020 jylǵa arnalǵan Akademııa jumysynyń josparyn bekitti, sondaı-aq kelesi basqosýdy Túrkııada ótkizýge kelisti.

Sonymen qatar, keńes músheleri birqatar máseleler boıynsha sheshim qabyldady. Túrki álemindegi merekelik datalar tizimi talqylandy, ǵylym men bilim salasyndaǵy seriktestik jaıy, ǵylymı-zertteý jobalary, sonymen qatar, baǵyttardyń basymdylyǵy sóz boldy.

Shara bastalmas buryn, agenttik tilshisiniń suraqtaryna jaýap bergen Ázerbaıjan Bilim mınıstri Djeıhýn Baıramov: «Búgin Bakýde Halyqaralyq Túrki akademııasy jumysyn bastaıdy. Keńes aıasynda kóptegen suraqtar men sharalardyń ótýi talqylanady. Akademııa qyzmetiniń baǵyttarynyń biri - túrki álemindegi biregeı tulǵalardy nasıhattaý. 2020 jylǵa arnalǵan baǵdarlama bekitiledi, onda Abaıdyń mereıtoıy qarastyrylǵan. Erekshe atap ótetin jaıt, búgin tústen keıin Baký memlekettik ýnıversıtetinde Ázerbaıjandaǵy Abaı jylyna arnalǵan ǵylymı-konferentsııa bolady. Aıta ketsem, atalmysh JOO-da kóp jyldan beri Abaı ortalyǵy jumys isteıdi jáne Abaı jylyn osy ortalyqta ashý óte mańyzdy. Jyl boıy Ázerbaıjannyń túrli ýnıversıtetterinde Abaı jylyna arnalǵan dóńgelek ústelder, ǵylymı semınarlar uıymdastyrylady. Ázerbaıjan delegatsııasy da Qazaqstan men basqa da túrkitildes memleketterde bolyp jatqan sharalarǵa qatysady dep oılaımyz», - dep atap ótken edi.

Túrki álemindegi 2020 jylǵy ataýly kúnderdiń ishinde Tonykók eskertkishiniń 1300 jyldyǵy, Ál-Farabıdiń 1150 jyldyǵy, Abaıdyń 175 jyldyǵy,Manastyń 1025 jyldyǵy, jazýshy ári pýblıtsıst Narıman Narımanovtyń 150 jyldyǵy bar.

Keleli bas qosýǵa Ázerbaıjan Respýblıkasynyń Bilim mınıstri Djeıhýn Baıramov, Halyqaralyq Túrki akademııasynyń basshysy Darhan Qydyráli, Qazaqstan Respýblıkasynyń Bilim jáne ǵylym mınıstrliginiń jaýapty hatshysy Qanat Sársembaev, Qyrǵyz Respýblıkasy Bilim jáne ǵylym mınıstrliginiń stats-hatshysy Japarkýl Tashıev, Túrkııa Respýblıkasy Ulttyq bilim mınıstrliginiń bilim jáne tárbıe keńesiniń tóraǵasy Býrhanettın Donmez jáne Ázerbaıjan Ǵylym akademııasynyń prezıdenti Ramız Mehdıev qatysty.

Shara qatysýshylary men qonaqtaryna kitap kórmesi uıymdastyryldy.