Bakýde halyqaralyq Naýryz festıvali ótýde

  BAKÝ. QazAqparat - Ázerbaıjan astanasynyń tarıhı bóligi Icherısheherde «Bahar Qalası» halyqaralyq Naýryz festıvali ótýde, dep habarlaıdy «QazAqparat» HAA Bakýdegi menshikti tilshisi.

Shara 26 naýryzǵa deıin jalǵasady, ol «Gosha gala» qaqpasynan bastalyp, Qyz munarasyna deıin ulasady. Oǵan Ázerbaıjan, Iran, Túrkııa, Reseı, Úndistan, Aýǵanstan, Ózbekstan, Grýzııa jáne Tájikstan aspazdary keledi. Qazaqstannyń atynan elimizdiń dıplomatııalyq korpýsy qatysady.

Naýryzǵa oraı, qalada merekelik jármeńke uıymdastyryldy, Naýryzdyń basty keıipkerleri - Kosa men Kechaldyń qatysýymen oıyn-saýyq sharalary,  kontserttik baǵdarlamalar men álem halyqtarynyń mýzykalary kórsetildi. Shara qonaqtary túrli baıqaýlarǵa qatysyp, juldyzdardyń ónerin tamashalap, kádeılar satyp ala alady.

Naýryz merekesin toılaý Ázerbaıjan halqy dástúrleriniń biri. Naýryzdan buryn tórt kún boıy qys merekesi toılanady, bul Eski jyldyń aıaqtalyp, Jańa jyldyń bastalǵanyn bildiredi.

Meıram kúnderi úıdi qulyptamaý da jazylmaǵan zańdardyń biri. Bul januıanyń qonaq kútip alýǵa ynta-yqylasyn bildiredi. Bul kúnderi balalar kórshiler men tanystarǵa baryp, merekelik syılyqtar alyp qaıtady.

 Jańa jyldyń alǵashqy kúni barlyq úıde túni boıy jaryq janyp turýy tıis. Eger ot óship qalsa, baqytsyzdyq keledi dep qoryqqan.

Naýryz meıramy - ázerbaıjandyqtardyń ejelgi jáne ásem merekesi.