Bakýde Formýla-1 boıynsha Ázerbaıjannyń toǵyzynshy Gran-prıi bastaldy
ASTANA. KAZINFORM – Bakýde Formýla-1 boıynsha 2025 jylǵy Ázerbaıjan Gran-prıi bastaldy. Bul qala toǵyzynshy ret álemdik dodaǵa tórin usynyp otyr, dep habarlaıdy agenttiktiń menshikti tilshisi.
Jarys aptalyǵy Formýla-2 dodasymen jáne Formýla-1-diń alǵashqy erkin jattyǵýlarymen bastaldy. Alǵashqy kezeńde Formýla-2 jarysynda amerıkalyq pılot Djek Kroýford (DAMS) birinshi bolyp márege jetti. Odan keıingi oryndardy Invista komandasynyń ıtalıalyq sportshysy Leonardo Fornarolı men Prema Racing ókili Gabrıele Mını bólisti.
Uzyndyǵy 6 shaqyrymdy quraıtyn Bakýdiń qalalyq saqınasy Formýla-1 kúntizbesindegi eń uzyn ári kúrdeli trassalardyń biri sanalady. Pılottar munda 51 aınalym jasap, 20 burylystan ótedi. Olardyń qatarynda áıgili Icherısheher aýdanyndaǵy tar ótkelder bar, munda joldyń eni nebári 7,6 metrge deıin qysqarady. Trassa jobasyn belgili nemis sáýletshisi German Tılke ázirlegen.
Jarystyń bastaý jáne márege jetý aımaǵy «Azadlyg» alańynda ornalasqan. Munda komandalardyń boks aımaǵy, pıt-leın jáne «Paddok Klýb» ornalasqan. Trassa Úkimet úıiniń janynan, ıÝNESKO dúnıejúzilik murasyna engen tarıhı Icherısheher arqyly ótip, Kaspıı teńizi jaǵalaýy boıymen jalǵasady.
Bıyl 10 komandadan 20 pılot, sonyń ishinde álemdik avtosport juldyzdary Lıýıs Hemılton, Fernando Alonso, Maks Ferstappen, Sharl Lekler syndy sportshylar baq synaıdy.
Baǵdarlamaǵa búgingi erkin jarystar men irikteý kezeńderi, senbi kúngi ekinshi erkin jattyǵý jáne Formýla-2 sprınt-gonkasy engen. Al basty báıge – 21 qyrkúıekte ótetin jarys Ázerbaıjan kezeńiniń jeńimpazyn anyqtaıdy.
Aıta keteıik, Baký Gran-prıi alǵash ret 2016 jyly ótti. Sol jyly jarys «Eýropa Gran-prıi» ataýymen ótip, nemis sportshysy Nıko Rosberg jeńimpaz atanǵan bolatyn. Keıingi jyldary Danıel Rıkkardo, Lıýıs Hemılton, Valtterı Bottas, Serhıo Peres, Maks Ferstappen jáne Oskar Pıastrı sekildi ataqty sportshylar Bakýde top jardy. Tek 2020 jyly pandemııaǵa baılanysty jarys uıymdastyrylǵan joq.
Mıllıondaǵan kórermen men on myńdaǵan jankúıer bul joly da sport, tarıh pen zamanaýı sáýlet toǵysqan aýqymdy sharanyń kýási bolady.
Buǵan deıin Ázerbaıjan bıligi Gran-prı qonaqtaryna jáne jarysqa qatysýshylarǵa arnalǵan vızalyq rejımdi jeńildetken bolatyn.