Bakýde «Formýla-1» Ázerbaıjan Gran-prıiniń onynshy kezeńi bastaldy
ASTANA. KAZINFORM — Bıyl onynshy ret ótip jatqan Ázerbaıjan Gran-prıi Baký qalalyq aınalma jolynda uıymdastyryldy. Jarys 26 qyrkúıekke deıin jalǵasady, dep habarlaıdy Kazinform agenttiginiń Ázerbaıjandaǵy menshikti tilshisi.
Bakýdegi jarys kúni tańerteń «Formýla-2» básekelerimen bastaldy. Saǵat 12:30–da «Formýla-1» júırikteri alǵashqy erkin jattyǵýǵa shyǵady. Budan keıin «Formýla-2» dodasynda eki irikteý kezeńi ótedi. Birinshi kúnniń jarys baǵdarlamasy Formýla-1 júrgizýshileriniń ekinshi erkin jattyǵýymen aıaqtalady.
25 qyrkúıek, juma kúni «Formýla-1» júrgizýshileri kezekti erkin jattyǵýǵa qatysady. Al «Formýla-2» dodasynda sprınttik jarys ótedi. Ázerbaıjan Gran-prıiniń basty jarysy 26 qyrkúıek, senbi kúni uıymdastyrylady.
Bakýde ótip jatqan onynshy kezeńge 10 komandadan 20 júrgizýshi qatysady. Olardyń qatarynda Lıýıs Hemılton, Djordj Rassell, Maks Ferstappen, Sharl Lekler sekildi chempıonattyń beldi ókilderi bar.
Baký qalalyq aınalma trassasynyń uzyndyǵy shamamen 6 shaqyrym, jarys jolynda 20 burylys bar. Trassa elordanyń ortalyq bóligin kesip ótip, tarıhı Icherı-Sheherdi aınalyp, Kaspıı jaǵalaýyna deıin jetedi. Trassanyń eń tar bólikteri 7,6 metrdi quraıdy.
Bakýdegi jarys joly uzyn ári jyldam túzý bólikteri men qalanyń tarıhı bóligindegi tar burylystardyń úılesimimen erekshelenedi. Jarys kezinde kórermender Icherı-Sheherdiń kórinisin, elordanyń zamanaýı sáýlet nysandaryn jáne Kaspıı teńiziniń panoramasyn tamashalaı alady.
Bıyl Baký qalalyq aınalma trassasynda jańa City trıbýnasy boı kóterdi. Ázerbaıjan memlekettik akademııalyq mýzykalyq teatrynyń qarsy betinde ornalasqan nysan 678 kórermendi qabyldaı alady. Jańa trıbýna ashylǵan soń, trassadaǵy kórermen oryndarynyń jalpy sany 21 myńnan asty.
Ázerbaıjan «Formýla-1» jarystaryn 2016 jyldan beri ótkizip keledi. Bakýdegi alǵashqy jarys Eýropa Gran-prıi ataýymen ótip, Nıko Rosbergtiń jeńisimen aıaqtaldy. Keıingi jyldary Bakýde Danıel Rıkkardo, Lıýıs Hemılton, Valtterı Bottas, Serhıo Peres, Maks Ferstappen jáne Oskar Pıastrı jeńimpaz atandy.
2020 jyly pandemııaǵa baılanysty Ázerbaıjan Gran-prıi ótkizilgen joq.
Buǵan deıin Ázerbaıjan astanasynyń «Formýla-1» Gran-prıine daıyndyǵy týraly habarlaǵan edik.
