Bakýde Eskendir Hasanǵalıevtiń shyǵarmashylyq keshi ótti
«Qazaqstan - Ázerbaıjan» Dostar klýbynyń, «Qazaqstan - Ázerbaıjan» Dostyq qoǵamynyń músheleri, Ázerbaıjan jurtshylyǵy, shyǵarmashylyq zııaly qaýym men BAQ ókilderi, baýyrlas elde turatyn otandastarymyz, stýdentter qatysqan keshti Qazaqstannyń Ázerbaıjandaǵy Elshiligi uıymdastyrdy.
Sharanyń ashylýynda sóz sóılegen Qazaqstannyń Ázerbaıjandaǵy elshisi Beıbit Isabaev dańqty kompozıtordyń «Atameken», «Ádemi-aý», «Saǵyndym seni», «Asyl arman», «Eskirmegen mahabbat», «Ómirimniń jazy» sııaqty kóptegen ánderi qazaqstandyq jáne sheteldik ánsúıer qaýymnyń súıip tyńdaıtyn ánderine aınalǵanyn tilge tıek etti. «Onyń shyǵarmashylyǵyna taqyryptardyń alýandyǵy, materıaldy jetkizýdegi jan-jaqtylyq sıpattary tán. Ol qazaq, orys, uıǵyr, tatar, nemis aqyndarynyń óleńderine án jazdy. Memleket basshysy Qazaqstan halqyna "Bolashaqqa baǵdar: rýhanı jańǵyrý" atty Joldaýynda qazirgi qoǵamnyń mádenı-rýhanı damýy men rýhanı qundylyqtardy órkendetýge erekshe kóńil bóldi. Halyqtyń mádenı, moraldyq jáne rýhanı muralarynsyz eshqandaı qoǵam kemel bola almaıdy. Ústimizdegi jyldyń sáýirinde Memleket basshysy N.Á. Nazarbaevtyń Ázerbaıjanǵa resmı saparynda prezıdentter eki eldiń mádenı baılanystaryn odan ári nyǵaıtý qajettigin aıtqan bolatyn. Búgingi Eskendir Hasanǵalıevtiń keshi sonyń bir jemisi ispettes», - dedi dıplomat.
Kesh qonaqtary ótken ǵasyrdyń 60-jyldarynan beri tamasha týyndylar berip kele jatqan belgili ánshi ári kompozıtordy jyly qarsy aldy. Halyq ártisi alǵashqy ári tanymal ánderiniń biri «Anaǵa sálem» atty ánimen keshtiń shymyldyǵyn ashty.
Jınalǵan halyq asa daryndy ónerpazdyń ánderinen bir jarym saǵattan artyq sýsyndady. Eskendir Hasanǵalıev jubaıy Darıkomen oryndaǵan ótken jyldar ánderi keshtiń ajaryn asha tústi. Árbir ánniń aldynda ańyz adam onyń shyǵý tarıhy men kimge arnalǵanyn aıtyp otyrdy.
Án keshi Qadyr Myrzalıevtiń óleńine jazylǵan áıgili «Atameken» ánimen aıaqtaldy. Ony shyrqaǵanda jınalǵan jurt ornynan turyp qoshemet kórsetti.
Shara sońynda «Qazaqstan - Ázerbaıjan» Dostar klýbynyń basshysy, Búkilálemdik túrki halyqtary kongresiniń prezıdenti ıAhıa Alıev E. Hasanǵalıevti túrki mádenıetine qosqan qomaqty úlesi úshin estelik medalmen marapattap, jastyq shaǵynda E. Hasanǵalıevtiń ánderin tyńdap óskenin aıtty. Óz kezeginde «Qazaqstan - Ázerbaıjan» Dostyq qoǵamynyń prezıdenti Eldar Gúnaıdyn qazaq kompozıtoryna estelik syılyqtar tapsyrdy.
