Bakýde Elbasynyń «Táýelsizdik dáýiri» kitaby tanystyryldy

BAKÝ. QazAqparat - Baký qalasyndaǵy Qazaqstan Elshiliginde Prezıdent Nursultan Nazarbaevtyń «Táýelsizdik dáýiri» atty kitabynyń tusaýy kesildi, dep habarlaıdy «QazAqparat» HAA Ázerbaıjandaǵy menshikti tilshisi.

Sharaǵa Qazaqstannyń dostary Klýbynyń músheleri, G.Alıev atyndaǵy «Ázerbaıjan-Qazaqstan» respýblıkalyq dostyq qoǵamynyń aktıvi, eldegi qoǵamdyq-saıası, ǵylym jáne mádenıet salasynyń maıtalmandary sondaı-aq BAQ ókilderi qatysty.

Jıynda sóz sóılegen Qazaqstan elshisi Beıbit Isabaev sharaǵa kelýshilerdi kitaptyń mazmunymen tanystyryp, Qazaqstannyń táýelsizdik alǵan jyldarda qol jetkizgen negizgi 33 nátıjesi týraly osy kitapta aıtylatynyn jetkizdi.

Dıplomat kitaptaǵy Qazaqstannyń Túrki álemi elderimen birlese atqarǵan jumystary, onyń ishinde Ázerbaıjan men júrgizilgen ekijaqty qarym-qatynastar týraly taraýǵa toqtalyp ótti.

Qonaqtar «Táýelsizdik dáýiri» kitabyn jańa zamandaǵy saıasattaný turǵysynan joǵary baǵalady.

G. Alıev atyndaǵy «Ázerbaıjan-Qazaqstan» respýblıkalyq dostyq qoǵamynyń prezıdenti, professor Eldar Gıýnaıdyń aıtýynsha, Qazaqstan Prezıdentiniń bul eńbegi el taǵdyryna beı-jaı qaraı almaıtyn kez kelgen adamnyń qalta kitabyna aınalýy kerek. Sebebi bul kitapta ótkenge baǵa berilip, búgingi kún men aldaǵy 50 jyldyq damýdyń tujyrymdamasy aıqyn kórsetilgen.

Bakýdegi slavıan ýnıversıtetiniń professory Nızamı Mamedov-Tagısoıdyń aıtýynsha, Qazaqstan Prezıdentiniń bul eńbegi túrki halyqtarynyń bárine qajet ortaq kitap bolmaq.