Bakýde Dúnıejúzilik qalalar forýmynyń 13-sessııasy bastaldy
ASTANA. KAZINFORM – Ázerbaıjan astanasy Baký qalasynda World Urban Forum 13 Dúnıejúzilik qalalar forýmynyń 13-sessııasy (WUF13) bastaldy. Forýmdy BUU-nyń Halyqty qonystandyrý baǵdarlamasy uıymdastyrdy. Bul týraly Anadolý jazdy.
Baký Olımpıada stadıonynda uıymdastyrylǵan alańdarda ótip jatqan WUF13 forýmy Ázerbaıjan úkimeti men BUU-nyń Halyqty qonystandyrý baǵdarlamasy birlesken kúsh-jigerimen uıymdastyryldy.
Forým Birikken Ulttar Uıymy men Ázerbaıjan týlaryn kóterý rásimimen ashyldy. Oǵan Anaklaýdııa Rossbah pen Ázerbaıjannyń Qala qurylysy jáne sáýlet jónindegi memlekettik komıtetiniń tóraǵasy Anar Gýlıev qatysty.
Forýmǵa qatysý úshin 182 elden 40 myńnan astam adam tirkelgen. Oǵan memlekettik qyzmetkerler, mýnıtsıpalıtet ókilderi, qala josparlaýshylary, akademııalyq orta ókilderi, jeke sektor men úkimettik emes uıymdardyń músheleri qatysyp jatyr. Forým barysynda turaqty ýrbanızatsııa, turǵyn úı daǵdarysy, klımatqa tózimdilik jáne qalalardyń bolashaǵy máseleleri talqylanady.
WUF13 «Álemdi baspanamen qamtý: qaýipsiz ári turaqty qalalar men qaýymdastyqtar» uranymen ótip jatyr. Forýmda jahandyq turǵyn úı máselelerin sheshý joldary men ınklıýzıvti ýrbanızatsııa saıasaty qarastyrylady.
Forým aıasynda mınıstrler kezdesýleri, joǵary deńgeıdegi sessııalar, paneldik pikirtalastar men kórmeler ótedi.
Kórme aımaǵynda Túrkııanyń Qorshaǵan orta, qala qurylysy jáne klımattyń ózgerýi mınıstrligi-niń stendi de qoıylǵan.
Resmı ashylýy erteń ótetin stendte kelýshilerge Túrkııanyń 2023 jylǵy jer silkinisterinen keıin júrgizip jatqan aýqymdy qalpyna keltirý jumystary týraly aqparat usynylady.
Kórme barysynda klımatqa tózimdi jáne turaqty qala qurylysy qaǵıdattaryna sáıkes úsh jyl ishinde salynǵan 455 myń turǵyn úı qurylysy jobasy jóninde málimet beriledi. Sondaı-aq halyqaralyq qatysýshylar Túrkııanyń tabıǵı apattardy basqarý jáne turaqty qalalyq damý salasyndaǵy tájirıbesimen tanysady.
Forýmnyń resmı ashylýy búgin prezıdent Ilham Álıevtiń qatysýymen ótedi. Forým 22 mamyrǵa deıin jalǵasady.
Dúnıejúzilik qalalar forýmy
World Urban Forum 2001 jyly Birikken Ulttar Uıymy tarapynan jedel ýrbanızatsııa máseleleri men onyń qoǵamdarǵa, qalalarǵa, elderge, klımattyń ózgerýine jáne saıası strategııalarǵa áserin talqylaý úshin qurylǵan.
Forým alǵash ret 2002 jyly Kenııa astanasy Naırobıde ótken jáne sodan beri álemniń túrli qalalarynda uıymdastyrylyp keledi.
BUU-nyń Halyqty qonystandyrý baǵdarlamasy uıymdastyratyn forým turaqty ýrbanızatsııa máselelerin sheshý joldaryn izdeýge arnalǵan joǵary deńgeıdegi eń ashyq ári ınklıýzıvti alańdardyń biri sanalady.
