Bakýde BUU-nyń Álemdik qalalar forýmyna arnalǵan kólik strategııasy tanystyryldy

Brıfıng barysynda jaýapty vedomstvolar forýmǵa qatysýshylar men qala turǵyndary úshin yńǵaıly ári tıimdi qozǵalysty qamtamasyz etýge baǵyttalǵan aýqymdy logıstıkalyq jospardy jarııa etti.

Jıynǵa ІІM janyndaǵy zııatkerlik kólik basqarý ortalyǵynyń basshysy Namıdan Pırıev, Azerbaijan Land Transport Agency ókili Emın Madjıdov jáne forýmnyń operatsııalyq kompanııasy kólik departamentiniń jetekshisi Výgar Aslanov qatysty.

Mamandardyń aıtýynsha, ázirlengen júıe delegatsııalardyń kelý baǵyttarynan bastap, qala ishindegi tsıfrlyq navıgatsııaǵa deıingi barlyq elementterdi qamtıdy. Negizgi maqsat – qozǵalysty sınhrondy ári túsinikti uıymdastyrý.

– Forým qatysýshylaryna aldyn ala ázirlengen marshrýttar, yńǵaıly kólik aýysý toraptary jáne naqty belgilengen kólik aımaqtary usynylady. Bul ýaqytty únemdep, qalalyq ınfraqurylymǵa túsetin júktemeni azaıtady, – dedi Výgar Aslanov.

Qoǵamdyq kólikke erekshe nazar aýdarylǵan. Emın Madjıdovtiń aıtýynsha, forým kezinde tasymal júıesi kúsheıtilgen rejımde jumys isteıdi. Birqatar magıstraldarda arnaıy jolaqtar engizilip, qosymsha jol belgileri men tańbalar ornatylady.

Sondaı-aq kólik-aýystyrý toraptaryn iske qosý, taksı qyzmetin ońtaılandyrý jáne mıkromobıldilikti damytý kózdelgen. Qoǵamdyq kóliktiń qozǵalysy AYNA platformasy arqyly naqty ýaqyt rejıminde baqylanyp, jol jaǵdaıyna jedel áreket etý múmkindigi qamtamasyz etiledi.

Namıdan Pırıev qozǵalysty retteý jol polıtsııasymen tyǵyz úılestiriletinin atap ótti. Bul forým qonaqtary men qala turǵyndary úshin turaqty kólik aǵynyn qamtamasyz etýge múmkindik beredi.

Jańa sheshimderdiń biri – negizgi magıstraldarda «jasyl dáliz» júıesin engizý. Ol baǵdarshamdardy úılestirip, keptelisterdiń aldyn alýǵa baǵyttalǵan.

Aıta keteıik, 2026 jyly Baký qalasy BUU-nyń Álemdik qalalar forýmyn qabyldaıdy.

Eske salaıyq, Qazaqstan men Ázerbaıjan birlesken týroperatordy iske qosty.