Bakýde áıgili munaıshy Safı Ótebaevqa barelef ornatyldy

BAKÝ. QazAqparat - Bakýdegi Ázerbaıjan memlekettik munaı jáne ónerkásip ýnıversıtetinde (ÁMMÓÝ) qazaqtyń áıgili munaıshysy, Qazaqstanǵa eńbegi sińgen ǵylym jáne tehnıka qaıratkeri Safı Ótebaevqa arnalǵan bareleftiń saltanatty ashylý rásimi bolyp ótti, dep habarlaıdy «QazAqparat» agenttiginiń menshikti tilshisi.

Іs-sharaǵa Qazaqstannyń Ázerbaıjandaǵy Elshisi Álim Baıel, ÁMMÓÝ rektory Mustafa Babanly, «Teńizshevroıl» kompanııasy bas dırektorynyń orynbasary Kóńilqosh Súıesinov, Safı Ótebaevtyń uly Maqsut Ótebaev, ÁMMÓÝ oqytýshylary men stýdentteri qatysty.

S.Ótebaev 1909 jylǵy 25 mamyrda Qazaqstannyń Atyraý oblysy Qarabaý aýylynda dúnıege kelgen. 1931-1935 jj. Baký munaı ınstıtýtynda (qazirgi ÁMMÓÝ) bilim alǵan. Ótebaev Qazaqstan munaı ónerkásibiniń negizin salýshylardyń biri bolyp sanalady. Eńbegi elenip, kóptegen memlekettik nagradalar jáne ordendermen marapattalǵan. Onyń esimi Atyraý munaı jáne gaz ýnıversıteti men Jylyoı munaı-gaz tehnologııalyq kolledjine berilgen.

Elshi Álim Baıel is-sharada aıtqan sózinde Qazaqstan men Ázerbaıjandy ortaq tarıh pen mádenıet qana emes, ekonomıkalarynyń uqsastyǵy da baılanystyryp turǵanyn atap ótti. Dıplomat tabıǵı resýrstardy elderimizdiń damýy maqsatyna paıdalanýdyń basty mindet ekenin aıtty.

Álim Baıel jınalǵandardyń nazaryn qos Memleket basshylary arasynda senimge negizdelgen tyǵyz dıalogtyń ornaǵanyna aýdardy. Joǵary deńgeıde qol jetkizilgen ýaǵdalastyqtardyń nátıjesinde bıyl alǵash ret qazaq munaıy Baký-Tbılısı-Jeıhan munaı qubyry arqyly tasymaldana bastady. Aldaǵy kezeńde osy baǵyt arqyly eksporttalatyn qazaq munaıynyń kólemin arttyrý josparlanýda.

ÁMMÓÝ rektory Mustafa Babanly óz sózinde Qazaqstan men Ázerbaıjan arasynda joǵary bilim salasynda ornaǵan yntymaqtastyqty damytýǵa nıetti ekenin málimdedi. Atap aıtqanda, ýnıversıtet Q.I.Sátbaev atyndaǵy Qazaq ulttyq ǵylymı-zertteý tehnıkalyq ýnıversıtetimen baılanysty belsendi túrde damytý ústinde. Babanly bareleftiń ashylýy eki el arasyndaǵy qarym-qatynasty jetildirýdiń taǵy bir belesi bolǵanyn atap ótti.

Óz kezeginde Maqsut Ótebaev barelef ornatyp, ákesiniń eńbegin joǵary baǵalaǵany úshin ázerbaıjan tarapy pen uıymdastyrýshylardyń barlyǵyna óz rızashylyǵyn bildirdi.