Bakýde Armenııa qarýly kúshteri barlaý reısteriniń joly kesilgeni belgili boldy
ASTANA.KAZINFORM - Ázerbaıjan Qorǵanys mınıstrligi eldiń birqatar baǵyttaǵy pozıtsııalaryna Armenııa Qarýly Kúshteriniń bólimsheleri oq jaýdyrǵanyn málimdedi, dep habarlaıdy Kazinform agenttiginiń menshikti tilshisi.
– 30 naýryz kúni saǵat 21:25 shamasynda Armenııa qarýly kúshteri dron paıdalana otyryp, Gerenzýr eldi mekeni baǵytynda Ázerbaıjan armııasynyń pozıtsııalaryna taǵy da barlaý ushýlaryn júzege asyrmaq boldy. Nátıjesinde Armenııanyń arandatý áreketiniń joly kesildi, - delingen Qorǵanys mınıstrligi málimdemesinde.
Sonymen qatar mınıstrliktiń habarlaýynsha, 31 naýryz kúni saǵat 22:30-dan 04:35-ke deıin armıan bólimsheleri Gorýs, Basarkechar jáne Chambarak oblystary baǵyttarynan Ázerbaıjan qarýly kúshteriniń pozıtsııalaryna birneshe ret oq jaýdyrǵan.
Buǵan deıin Ázerbaıjan Qorǵanys mınıstrligi 29 jáne 30 naýryzda Armenııa qarýly kúshteri Ázerbaıjanmen shekarada dron arqyly úsh ret barlaý ushýyn júzege asyrmaq bolǵanyn, onyń aldyn alǵanyn habarlaǵan.
Armenııa Qorǵanys mınıstrligi Ázerbaıjan tarapynyń shekaranyń shyǵys jáne ońtústik-shyǵys bólikterinde atysty toqtatý rejımin buzǵany týraly habarlamasyn joqqa shyǵardy. Vedomstvo Ázerbaıjan Qorǵanys mınıstrliginiń málimdemesin rastaıtyn faktilerdi armıan tarapyna usynǵan jaǵdaıda tekserýge daıyn ekenin aıtty.
Buǵan deıin Ázerbaıjan tarapy Armenııany beıbit kelisimge qol qoıý protsesin tezdetýge shaqyrǵan.
13 naýryzda Ázerbaıjan men Armenııanyń Syrtqy ister mınıstrlikteri taraptar kelissózderdi aıaqtap, bitimgershilik kelisiminiń jobasyn keliskenin rastady.