Bakýde álemdegi eń úlken memlekettik jalaý ornatyldy
BAKÝ. Qyrkúıektiń 2-si. QazAqparat /Arnur Muhametkárim/ - Ázirbaıjan Prezıdenti Ilham Álıev keshe, qyrkúıektiń 1-i kúni Bakýde Memlekettik jalaý alańynyń ashylý rásimine qatysty.
Ázirbaıjan telegraf agenttiginiń habarlaýynsha, Bakýde Memlekettik jalaý alańyn qurý týraly ókimge 2007 jyly qarashanyń 17-sinde qol qoıylǵan bolatyn. Osyǵan baılanysty qarashanyń 9-ynda respýblıkada Memlekettik jalaý kúni retinde atap ótiletin bolady.
Amerıkandyq «Trident Support» kompanııasy ázirlegen jobany Ázirbaıjannyń «Azenko» kompanııasy júzege asyrdy. Jalpy aýdany 60 gektardy alyp jatqan alańda barlyq ınfraqurylym qurylyp otyr. Arnaıy jobaǵa negizdelgen qurylys jumystarynyń barlyǵyn jergilikti jáne sheteldik mamandar oryndady.
Alańǵa ornatylǵan flagshtoktyń bıiktigi - 162 metr, al onyń irgetasynyń dıametri - 3,2 metrdi qurasa, joǵary bóliginiń dıametri -1,09 metr. Qurylǵynyń jalpy salmaǵy 220 tonnany shamalaıdy. Al flagshtokqa ornatylǵan jalaýdyń eni - 35 metr, uzyndyǵy 70 metr, jalpy aýdany 2450 sharshymetr, al salmaǵy 350 keli shamasynda.
Aıta ketý kerek, 2010 jyly tamyzdyń 29-ynda Gınnestiń Rekordtar kitaby Ázirbaıjannyń Memlekettik jalaýynyń flagshtogy álemdegi eń bıik tuǵyr ekenin qýattady.
Alańda ornatylǵan Ázirbaıjan Respýblıkasynyń eltańbasy, memlekettik ánurannyń mátini men el kartasy altyn jalatylǵan qoladan jasalyp otyr.
