«Baký-Tblısı-Djeıhan» qubyrymen munaı eksporty 1 mln 392 myń tonnaǵa ulǵaıdy

Byltyr Aqtaý portynan eksportqa 3 mln 376 myń tonna munaı tasymaldanǵan. Bul burnaǵy jylǵy kórsetkishten 1 mln 108 myń tonnaǵa kóp, dep habarlaıdy Kazinform.

«QazTransOıl» kompanııasynyń baspasóz qyzmetinen máim etkendeı, Qazaqstan munaıyn Aqtaý portynan eksportqa tasymaldaý kóleminiń artýy «Baký-Tbılısı-Djeıhan» munaı qubyry baǵytynda jóneltiletin shıkizat kóleminiń ulǵaıýymen baılanysty bolyp otyr.

«2022 jyly Qazaqstan Respýblıkasynyń Prezıdenti Qasym-Jomart Toqaev Transkaspıı dálizi boıynsha munaı tasymaldaýdy arttyrýdy tapsyrdy. Osy tapsyrmaǵa sáıkes «QazMunaıGaz» UK AQ men Ázirbaıjan Respýblıkasynyń SOCAR memlekettik munaı kompanııasy «Teńiz» kenishinen «Baký-Tbılısı-Djeıhan» munaı qubyry baǵytynda jylyna 1,5 mıllıon tonnaǵa deıin munaı tasymaldaýdy kózdeıtin kelisim jasady. Byltyr «Baký-Tbılısı-Djeıhan» baǵytymen tasymaldanǵan munaı 250 myń tonnadan 1 mln 392 myń tonnaǵa artty. Bul 2022 jyldyń sáıkes kezeńimen salystyrǵanda 5,5 esege artyq. «Teńiz» kenishinen osy baǵyt boıynsha 1 mıllıon 057 myń tonna munaı jóneltildi», -dep habarlady kompanııanyń baspasóz qyzmeti.

Sondaı-aq, Aqtaý portynan Mahachkala portyna qaraı 1 mln 984 myń tonna munaı jiberilgen.

Eske sala ketelik, budan buryn Kaspıı qubyr konsortsıýmy Qazaqstannan 56 mln tonna munaı tasymaldaǵanyn habarlaǵan edik.