Baký-Tbılısı-Jeıhan qubyry arqyly Qazaqstan munaıynyń eksportyn arttyra alamyz – Ázerbaıjan vıtse-mınıstri
ASTANA. KAZINFORM – Ázerbaıjan energetıka mınıstriniń orynbasary Orhan Zeınalov Ortalyq Azııa elderi jáne Ázerbaıjan energetıka mınıstrleriniń kezdesýinde óz eliniń óńirdiń energetıka naryǵyndaǵy orny týraly paıymyn aıtty.
«Byltyrǵy naýryz aıynda Qazaqstan munaıyn Baký-Tbılısı-Jeıhan qubyry arqyly tasymaldaý qaıta jandandy. Bul áriptestiktiń jaǵymdy dınamıkasy keleshekte munaı tasymalynyń deńgeıin arttyrýǵa jol ashady. Energetıkalyq yqpaldastyqty arttyrý úshin Qazaqstan jáne Ázerbaıjan úkimetteriniń arasynda energetıka salasyndaǵy strategııalyq kelisimniń jobasy ázirlendi. Bul qujatqa qol qoıý aradaǵy qarym-qatynasty strategııalyq deńgeıge kóteretinine senimdimin», - dedi ázerbaıjandyq vıtse-mınıstr.
Sondaı-aq, ol Qazaqstan, Ázerbaıjan, Ózbekstan energııa júıelerin biriktirý arqyly Ortalyq Azııadan Eýropaǵa jasyl energııa eksporttaý jobasy jaqsy bastalǵanyn atap ótti.
«Taraptar jobany júzege asyrýdyń tehnıkalyq ekonomıkalyq negizdemesin ázirleý týraly tehnıkalyq tapsyrmany bekitti. Birlesken jumys toby Bakýde ulttyq kompanııalardyń úlesi bar birlesken kásiporyn qurý týraly kelisimge keldi. Al Italııanyń «CESI» atty konsaltıng kompanııasy jobanyń tehnıkalyq-ekonomıkalyq negizdemesin jasaıtyn boldy.
Sondaı-aq, Ázerbaıjan, Qazaqstan, Ózbekstan úkimetteriniń arasynda jasyl energııa berý jáne damytý salasyndaǵy strategııalyq áriptestik týraly kelisim mátini maquldandy. Bul qujatqa qol qoıý jobanyń tabysty iske asýyna qamtamasyz etedi.
Ázerbaıjan arqyly ótetin osy jáne ózge de eksport dálizderi jasyl energııany Ortalyq Azııadan Eýropaǵa berýdiń keleshek múmkindikterin keńeıtedi. Bul dálizderge jol tabý arqyly Ortalyq Azııa elderi elektr qýatynyń resýrstaryn eksporttaý naryǵyn ártaraptandyrýǵa múmkindik alady», - dedi Orhan Zeınalov.
