Baký soty Turan aqparat agenttiginiń basshysyn qamaýǵa aldy
ASTANA. QazAqparat - Bakýdyń ıAsamal aýdandyq soty Turan aqparat agenttiginiń dırektory Mehman Alıevti úsh aıǵa qamaýǵa aldy. Bul týraly agenttiktiń ózi habarlady.
Alıev beısenbi kúni salyq tóleýden jaltarý, qyzmettik ókilettigin asyra paıdalaný boıynsha kúdikti dep tanylyp, qamaýǵa alyndy. Buǵan qosa, oǵan zańsyz kásipkerlikpen aınalysty degen aıyp taǵylýda.
Agenttik málimetinshe, Alıevti jeti jylǵa deıin bas bostandyǵynan aıyrýy múmkin.
Ótken aptada Alıev Frans-press agenttigine el bıligi kásiporyn shottaryn buǵattap tastaǵanyn jáne ony qamaýǵa alýy múmkindigin málim etken bolatyn.
Buǵan deıin Ázerbaıjan salyq mınıstrliginiń ókilderi agenttikke tintý júrgizip, 2014 jyldan bergi qarjylyq qujattaryn alyp ketken. Halyqaralyq jýrnalısterdi qorǵaý komıteti Turan-nyń Ázerbaıjandaǵy jalǵyz táýelsiz aqaparat agenttigi ekendigin aıtyp, bılikti onyń qyzmetkerlerine qysym kórsetýin toqtatýǵa shaqyrdy.
