Baký Shyǵys-Batys dáliziniń ótkizý qabiletin 25 mln tonnaǵa deıin ulǵaıtady
ASTANA. KAZINFORM – Ázerbaıjan prezıdenti Ilham Álıev keńes ótkizip, onda el astanasy Baký men onyń tóńiregindegi negizgi problemalardy, eldiń kólik ınfraqurylymyn damytý máselelerin talqylady, dep habarlaıdy Kazinform menshikti tilshisi.
- Sońǵy 30 jylda Ázerbaıjan halqynyń sany 7 mln-nan 10 mln adamǵadeıin ósti. Bizdiń jol ınfraqurylymy, sonyń ishinde metro júıesi mundaı ósimge saı emes, - dedi prezıdent.
Prezıdent qalanyń kólik máselesin sheshý úshin odan ári áreket etý qajettigin aıtty.
- Biz jaqyn arada Bakýdiń kólik ınfraqurylymyn odan ári jaqsartýǵa arnalǵan jańa úkimettik baǵdarlamany qabyldaımyz, - dedi ol, bul baǵdarlama boıynsha jumys birneshe aıdan beri júrgizilip jatqanyn qosyp ótip.
Álıev avtomobıl jáne áýe kóliginen basqa Ázerbaıjandaǵy teńiz kóliginiń damýyn, onyń ishinde jylyna 15 mln tonnaǵa deıin júk ótkizýge arnalǵan jańa teńiz portynyń qurylysyn, sondaı-aq suranystyń ósý qarqynyn qanaǵattandyrý úshin qýattylyqty odan ári keńeıtý josparlaryn atap ótti.
- Biz porttyń ótkizý qabiletin 25 mln tonnaǵa deıin ulǵaıtýymyz kerek, múmkin bul bizge jetkiliksiz bolar, óıtkeni Shyǵys-Batys kólik dálizi boıynsha júk tasymalynyń kólemi tez ósip jatyr, biz bul jumystardy osy ósimge sáıkes júrgizýimiz kerek, - dep qosty ol Ilham Álıev.
Sóz sońynda memleket basshysy úkimet kólikke baǵyttalǵan jańa memlekettik baǵdarlama qabyldaıtynyn atap ótti. Ol tıisti mekemeler arasyndaǵy yntymaqtastyq qajettigin atap ótip, halyqty baǵdarlamanyń sátti ótýine úles qosýǵa shaqyrdy.
Osyǵan deıin Ázerbaıjannyń Bolgarııaǵa jetkiziletin gaz kólemin eki ese arttyrǵanyn jazdyq.