Baký sarapshysy: Pýtınniń Qazaqstanǵa sapary Astananyń kópvektorly saıasat ustanymyn rastady
ASTANA. KAZINFORM – Reseı Prezıdenti Vladımır Pýtınniń mamyr aıynda Qazaqstanǵa jasaǵan sapary men Eýrazııalyq ekonomıkalyq forýmnyń qorytyndylary jahandyq báseke kúsheıgen kezeńde óńir elderiniń múddeler tepe-teńdigin saqtaýǵa umtylatynyn kórsetti. Mundaı pikirdi Kazinform agenttiginiń Bakýdegi menshikti tilshisine bergen suhbatynda Saıası tehnologııalar ortalyǵynyń prezıdenti, saıasattanýshy ári «Vali Alibayov: Polıtıka bez ıllıýzıı» taldamalyq arnasynyń avtory Valı Alıbaıov aıtty.
Sarapshynyń aıtýynsha, búginde Ortalyq Azııa birneshe iri álemdik kúsh ortalyǵynyń múddesi toǵysqan keńistikke aınalyp otyr. Osy turǵydan alǵanda Reseı basshysynyń EAEO sammıtine qatysýy Máskeýdiń óńirdegi ornyn uzaq merzimdi jobalar arqyly saqtaýǵa múddeli ekenin kórsetedi.
Valı Alıbaıovtyń pikirinshe, Astana syrtqy saıasattaǵy derbestigin saqtaı otyryp, ártúrli halyqaralyq seriktestermen yntymaqtastyqty qatar damytyp keledi.
— Bul — tepe-teńdik saqtaýǵa negizdelgen pragmatıkalyq saıasat. Qazaqstan iri derjavalar arasyndaǵy básekeden tıimdi paıdalanýǵa tyrysady, biraq olardyń eshqaısysyna táýeldi bolýǵa jol bermeıdi, — dedi ol.
Sarapshy Qazaqstan men Reseıdiń energetıka salasyndaǵy yntymaqtastyǵyna da toqtaldy. Onyń aıtýynsha, qazaqstandyq munaıdyń edáýir bóligi Reseıdiń ınfraqurylymy arqyly eksporttalady. Al Qazaqstan Reseıdiń energetıkalyq resýrstaryn Qytaı men Ortalyq Azııa elderine jetkizýde mańyzdy tranzıttik ról atqarady.
Valı Alıbaıov kelissózderdiń gýmanıtarlyq baǵytyn da erekshe atap ótti. Onyń aıtýynsha, taraptar «Qazaqstan men Reseı halyqtary arasyndaǵy dostyq pen tatý kórshiliktiń jeti negizi týraly» birlesken málimdemege qol qoıyp, bilim berý salasyndaǵy ortaq jobalardy júzege asyrýǵa kelisken.
— Gýmanıtarlyq bastamalar men bilim berý jobalary arqyly Máskeý óńirmen mádenı jáne qoǵamdyq baılanystaryn saqtaýǵa umtylady. Bul — «jumsaq kúshtiń» mańyzdy tetikteriniń biri, — dedi sarapshy.
Eýrazııalyq ekonomıkalyq forýmnyń qorytyndylaryna toqtalǵan ol jasandy ıntellekt taqyrybynyń aıasynda saýda, logıstıka jáne keden rásimderin jańǵyrtýǵa baǵyttalǵan naqty mindetter talqylanǵanyn aıtty.
— Qazir EAEO elderi úshin biryńǵaı tsıfrlyq standarttardy engizý men úderisterdi avtomattandyrý asa mańyzdy. Onsyz bızneske jahandyq básekege tótep berý qıyn bolady, — dedi Valı Alıbaıov.
Sarapshy EAEO-nyń keleshegine qatysty pikir bildire otyryp, birlestiktiń birtindep pragmatıkalyq ekonomıkalyq alańǵa aınalyp kele jatqanyn aıtty.
— Qazir tereń saıası odaq qurý týraly sóz bolyp otyrǵan joq. Óńir elderi egemendik máselesine erekshe mán beredi. Soǵan qaramastan, EAEO saýdany, tranzıtti jáne ekonomıkalyq baılanysty jeńildetetin tetik retinde óz mańyzyn saqtap otyr, — dep túıindedi sarapshy.
Aıta keteıik, buǵan deıin reseılik sarapshy Astana men Máskeý arasyndaǵy áriptestiktiń jan-jaqty sıpatqa ıe ekenin aıtqan edi.
