Baký ortalyǵynda kóshkin júrdi

BAKÝ. TREND - QazAqparat - Baký qalasynyń ortalyǵyndaǵy Sabaılskıı aýdanynda kóshkin júrdi, dep habarlaıdy QazAqparat Trend agenttigine silteme jasap.

Ázerbaıjannyń Tótenshe jaǵdaılar mınıstrliginiń málimetinshe, keshe, 28 qańtar kúni 21:05 shamasynda «112» jedel jelisine Bakýdiń Sabaılskıı aýdanyndaǵy «20-shy aýmaq» dep atalatyn aımaǵyndaǵy tasjolda kóshkin júrgeni týraly aqparat túsken.

Oqıǵa ornyna jedel túrde TJM mekemeleriniń ókilderi men qutqarýshylar jiberildi. Qajetti qaýipsizdik sharalary qoldanylyp, tıisti memlekettik organdar habardar etildi.

Alǵashqy tekserý kezinde kóshkin saldarynan jaqyn mańdaǵy úılerdiń zardap shekpegeni anyqtaldy.