Baký «Formýla-1» Gran-prıin qabyldap jatyr: apattar, jeńister jáne Norrıstiń úzdik aınalymy

ASTANA. KAZINFORM — Bakýde 21 qyrkúıekte aıaqtalatyn Ázerbaıjannyń «Formýla-1» Gran-prıi ótip jatyr. Jarys aptalyǵy barysynda «Formýla-1» jáne «Formýla-2» syndary boldy, dep habarlaıdy Kazinform agenttiginiń menshikti tilshisi.

Búgin tańerteń «Formýla-2» sprınti ótti, oǵan 11 komanda qatysty. Jeńimpaz atanǵan shved sportshysy Dıno Beganovıch TGR komandasynan boldy. Aldyńǵy kúni birinshi jattyǵý seansynda Aleks Dann úzdik nátıje kórsetse, synaq kvalıfıkatsııasynda Djek Kroýford (DAMS) alda turdy.

«Formýla-1» serııasynda búgin úshinshi jattyǵý seansy ótti, oǵan 10 komanda qatysty. Pılottar bir saǵat boıy alty shaqyrymdyq aınalymdardan ótip jarysty. Úzdik nátıje «Maklaren» komandasynyń qatysýshysy Lando Norrıske tıesili boldy.

Búgin «Formýla-1» kvalıfıkatsııasy da ótti, biraq úshinshi kezeńdegi birneshe apattarǵa baılanysty toqtatyldy.

Birinshiden, Aleks Albonnyń (Atlassian Williams Racing) bolıdi tosqaýylǵa soǵyldy. Odan keıin «Maklaren» pıloty Oskar Pıastrı úshinshi burylysta apatqa ushyrap, kóligin zaqymdady, biraq aman qaldy.

Keıin Sharl Lekler (Ferrari) de tosqaýylǵa soǵylyp, Bakýde besinshi ret qatarynan kvalıfıkatsııany jeńý múmkindiginen aıyryldy.

Qyzyl tý Nıko Hıýlkenbergtiń (Sauber) tórtinshi burylystaǵy apatynan keıin de kóterildi.

Kvalıfıkatsııa qorytyndysy boıynsha úzdik ýaqytty «Red Býll» komandasynyń qatysýshysy Maks Ferstappe kórsetti.

Ázerbaıjan Gran-prıiniń aıaqtalýyna deıin birneshe mańyzdy jarystar qaldy, onyń ishinde negizgi jarys kúni de bar.

Aıta keteıik, Ázerbaıjan Gran-prıi 2016 jyldan beri Baký qalasynda ótkizilip keledi, jaqynda jarysty 2030 jylǵa deıin ótkizý kelisimi jasaldy.

Buǵan deıin habarlanǵandaı, Ázerbaıjan astanasy 2025 jyly «Formýla-1» Gran-prıin toǵyzynshy ret qabyldaıdy.