Baqtyqoja Іzmuhambetov kezekten tys saılaý ótkizýdiń basty qajettilikterin atady
«Búgin biz Ardagerler uıymy respýblıkalyq qoǵamdyq birlestiginiń prezıdıýmyn ótkizdik. Bul prezıdıýmda qaralǵan másele - Prezıdent Qasym-Jomart Toqaevtyń úndeýine baılanysty boldy. Ardagerler uıymy - bul sheshimdi qoldaıdy», - deıdi Baqtyqoja Іzmuhambetov Ardagerler uıymynyń keńeıtilgen otyrysynan keıin tilshilerdiń suraǵyna bergen jaýabynda.
Onyń aıtýynsha, prezıdenttik saılaýdyń qajettiligine qatysty taǵy bir másele bar.
«Bizdiń elimizge sonaý odaq qulap, táýelsizdik alǵannan bastap Elbasy Nursultan Nazarbaevtyń eńbeginiń arqasynda memleketke asa kólemdi ınvestıtsııa keldi. Sol ınvestıtsııa salǵan úlken alpaýyt kompanııalardyń alańdap otyrǵany da jasyryn emes. Mine, sol sebepti, qazir az ýaqyttyń ishinde halqymyz óziniń Prezıdentin saılap, eldiń birligin, tutastyǵyn tolyqtaı qamtamasyz etý kerek. Sondyqtan, búgingi otyrysta Prezıdenttiń úndeýin tolyqtaı qoldaýǵa baǵyttalǵan málimdeme qabyldadyq», - deıdi Baqtyqoja Іzmuhambetov.
Eske sala ketsek, Ardagerler uıymy músheleriniń búgingi keńeıtilgen otyrysynda Ardagerler uıymynyń basshylyǵy Memleket basshysy Qasym-Jomart Toqaevtyń Qazaqstan halqyna úndeýine qoldaý bildiretindikterin málimdegen bolatyn.
Aıta ketsek, aǵymdaǵy jyldyń 9 maýsymynda elimizde kezekten tys prezıdenttik saılaý ótedi. Bul týraly respýblıkalyq telearnalardan Qazaqstan halqyna úndeý jarııalaǵan Memleket basshysy Qasym-Jomart Toqaev aıtty.
Memleket basshysy Qasym-Jomart Toqaevtyń respýblıkalyq telearnalar arqyly Qazaqstan halqyna joldaǵan úndeýiniń tolyq mátinin myna siltemeden oqýǵa bolady.
