Baqtybaı Jumadildın: 1917 jyly qazaq dalasynda 72 mln bas mal bolǵan

NUR-SULTAN. QazAqparat - «Qazaqtaný» zertteý ınstıtýtynyń dırektory Baqtybaı Jumadildın bolshevıkter bılikke kelgenge deıin qazaq dalasynda 100 mln bas mal bolǵanyn aıtty, dep habarlaıdy QazAqparat tilshisi.

Ulttyq mýzeıde ótken «Uly dalanyń uly tulǵalary» atty tarıhı-tanymdyq dóńgelek ústel barysynda tarıhshylar saıası súrginniń qazaqty attan túsirip, malyn qurtýdan bastalǵanyn aıtty.

«Keıbir derekterde HH ǵasyrdyń basynda qazaq dalasynda 100 mln bas mal bolǵanyn aıtady. Sonyń sońyna túsip, zerttep jatqan eshkim joq. Al 1917 jylǵy sanaqta qazaqtardyń qolynda 72 mln bas mal bolǵan. 1928 jyly ol 40 mln basqa tústi. Odan keıingi 3 jylda álgi 40 mln maldan 4,5 mln bas qaldy», deıdi tarıhshy jýrnalıst.

Qazaqtanýshy ǵalym oqýshylarǵa «baı» degen uǵymnyń máni múlde burmalanyp ketkenin de aıtty.

«Baı» degen sózdiń túpki maǵynasy «er», «qolynan is keletin azamat» degendi bildiredi. Túrikterdiń myrzany «beı» deıtini soǵan dálel. Osyndaı aıaýly uǵymdy bolshevıkter sanamyzǵa tap retinde tańyp, «qanaýshy» degen mán ústep jiberdi. Sol baılardy qýdalap, qurtý arqyly qazaqty bassyz qaldyrdy», - dedi tarıhshy.