Baqtııar Artaevqa Vel Barker kýbogy qaıtaryldy
ASTANA. KAZINFORM - Búgin Astanada Qazaqstan boks federatsııasynyń prezıdenti Shahmurat Mútálip pen bokstan Olımpıada chempıony Baqtııar Artaevtyń qatysýymen kezdesý ótti.
Federatsııanyń baspasóz qyzmeti málimetinshe, basqosýdyń negizgi maqsaty – Baqtııar Artaevqa Vel Barker kýbogyn tabystaý.
Vel Barker Kýbogy – Olımpıada Oıyndaryndaǵy úzdik boksshyǵa beriletin qaıtalanbas júlde.
2004 jyly Afınadaǵy básekede chempıon atanǵan Baqtııar Artaev jarystyń úzdik bylǵary qolǵap sheberi dep tanyldy. Artaev óz kýbogyn birneshe jyl buryn halyqaralyq uıymǵa tapsyryp, osy másele sheshimin tappaǵan edi. Qazaqstan boks federatsııasy álemdik sporttaǵy qundy jádiger sanalatyn júldeni qaıtarý úshin naqty qadamdar jasady.
Osylaısha, búgin Vel Barker Kýbogy óz ıesin tapty.
Aıta keteıik, Baqtııar Artaev jańa qyzmetke taǵaıyndalǵan bolatyn.