Baqtııar Artaev Olımpıada jóninde: Biz ádettegideı bas bapkerge sendik

NUR-SULTAN. QazAqparat - Qazaqstan boks federatsııasynyń bapkerlik máseleler jónindegi vıtse-prezıdenti, bokstan QR quramasynyń memlekettik jattyqtyrýshysy Baqtııar Artaev Olımpıadadaǵy boksshylardyń ónerine baǵa berdi, dep habarlaıdy QazAqparat tilshisi.

Ortalyq kommýnıkatsııalar qyzmetindegi baspasóz máslıhatynda Tokıoda ótken Olımpıadada qazaqstandyq boksshylardyń altyn medal almaýyna ne kedergi bolǵany týraly suraldy.

«Ár nárseni óz ataýymen aıtatyn ýaqyt keldi ǵoı. Osy oraıda sátsizdik degen oryndy bolar, ıaǵnı óte tómen nátıje. Elimizdegi 19 mln jankúıer bar ekenin eskersek, kóshedegi adamdar bokstyń ahýalyn talqylap jatyr. Sondyqtan óte nashar kórsetkish. Bul jerde eshkim eshkimdi aqtaıyn dep jatqan joq, ózimizdi aqtaýdan aýlaqpyz. Jigitter qolynan kelgenin bárin istedi. Ashyǵyn aıtý kerek, biz ádettegideı bas bapkerge sendik. Bul turǵyda osy sózimmen bas bapkerge búkil júkti ysyra salyp, ózimiz sýdan tazamyz dep aıtýdan aýlaqpyn. Bul rette júıeli jumys jasaldy, búkil jarystarǵa baryp, oqý-jattyǵý jıyndary ótti», - dedi B. Artaev.

Osy oraıda Tokıda boksshylar eki qolaǵa qol jetkizgenin, alaıda Rıo Olımpıadasyndaǵydaı nátıje bolmaǵanyn eske saldy.

«Mundaı kórsetkishke qol jetkize almaǵannan keıin, qazir endi saraptama jumystaryn júrgizý kerek. Kóp suraq týyndady, úsh bala óz ornyna bara almady degen ýáj aıtyldy», - dedi Baqtııar Artaev.