Baqtııar Artaev daryndy boksshylardy «Astana Arlansqa» shaqyrmaq
AQTÓBE. QazAqparat -Aqtóbede bokstan jastar arasynda QR chempıonaty ótip jatyr. Olımpıada chempıony Baqtııar Artaev «Astana Arlans» klýbyna myqty boksshylardy shaqyrý úshin Aqtóbege arnaıy keldi, dep habarlaıdy QazAqparat tilshisi oblystyq sport basqarmasynyń baspasóz qyzmetine silteme jasap.
Aqtóbe qalasyndaǵy Jekpe-jek sport saraıynda bokstan jastar arasynda el chempıonaty ótip jatyr. Sharanyń ashylýyna Olımpıada chempıony Baqtııar Artaev, tanymal boksshy Gennadıı Golovkınniń birinshi jattyqtyrýshysy, QR jastar arasyndaǵy quramasynyń aǵa jattyqtyrýshysy Ǵalymbek Kenjebaev qatysty.
«Jastar arasyndaǵy sportshylardyń qabiletin baıqap, kelesi jyly «Astana Arlans» klýbyna myqty boksshylardy jasaqtasam degen oıym bar. Sol úshin arnaıy kelip otyrmyn. Taǵy da aıtyp ótkim keledi, myna keremetteı «Jekpe-jek» saraıyn jeke kásipkerdiń salyp, memlekettiń balansyna bergenin birinshi ret kórip turmyn. Sondyqtan, elimizdiń basqa kásipkerleriniń «qulaǵyna altyn syrǵa». Osylaı ár óńirde osyndaı ǵımarattar boı kóterse, qazaq sportynyń bolashaǵy jaman bolmas edi»,- dedi bokstan Olımpıada chempıony Baqtııar Artaev.
Al, Gennadıı Golovkınniń birinshi jattyqtyrýshysy, QR jastar arasyndaǵy quramasynyń aǵa jattyqtyrýshysy Ǵalymbek Kenjebaev qazaq elinen áli de talaı Gennadıı Golovkınniń shyǵatyna senimdi ekenin jetkizdi.
«Jastar arasyndaǵy birinshilikke respýblıkamyzdyń barlyq aımaǵynan eń myqty boksshylar jınaldy. Olar jeńiske jetý jolynda aıanbaı, ózderin kórsetedi degen oıdamyn. Sebebi, QR Ulttyq quramasyna sportshylar saralanyp alynatyn bolady»,- dep atap ótti Ǵalymbek Kenjebaev.
Aıta keteıik, chempıonatqa elimizdiń barlyq aımaǵynan 180 sportshy qatysyp jatyr. Jarys mamyr aıynyń 16-na deıin jalǵasyn tabady. Onyń qorytyndysy boıynsha elimizdiń qurama komandasyna jáne 2018 jyly Argentınanyń Býenos-Aıreste qalasynda ótetin jasóspirimder arasyndaǵy Olımpıada oıyndaryna sportshylar irikteledi.
