Baqtıer Zaınýtdınov jankúıerlerge jaǵymdy jańalyǵyn jetkizdi

ASTANA. KAZINFORM - Máskeýlik «Dınamo» jáne Qazaqstan quramasynyń jartylaı qorǵaýshysy Baqtıer Zaınýtdınov Instagram paraqshasynda jankúıerlerge jaǵymdy jazba jarııalady.

Zaınýtdınov zalda jattyǵý jasap jatqan beınejazbasyn jarııalap, «biz jumysqa kirisemiz» degen jazba qaldyrǵan.

Baqtıer Zaınýtdınov bıylǵy maýsymda «Dınamo» komandasy sapynda Reseı birinshiligi men kýbogynda on oıynǵa qatysty. Ázirge nátıjeli áreketimen kózge túse qoıǵan joq.

Qazaqstandyq fýtbolshy ótken jyldyń qazan aıynyń ortasynda sońǵy oıynyn ótkizgen edi. Sodan keıin jaraqatynan aıyǵýǵa kóńil bólip keledi.

Qazir Reseı birinshiligi qysqy úziliske ketti. Ol aqpan aıynyń aıaǵyna taman qaıta jalǵasady.

Aıta ketsek, ol reseılik komanda quramyna ótken jyldyń shilde aıynda qosyldy.

Baqtıer Zaınýtdınov jańa klýbymen 2029 jylǵa deıin kelisimshartqa qol qoıdy. Reseılik komanda ol úshin «Beshıktashqa» 2,5 mln eýro tóledi.

Otandasymyz 1998 jyldyń 2 sáýirinde dúnıege kelgen. Buǵan deıin qazaqstandyq «Taraz», «Astana» fýtbol klýbtarynda, Reseıdiń «Rostov» jáne TsSKA komandalarynda dop tepti.

Qazirge deıin ol Túrkııanyń «Beshıktash» klýby sapynda oıyn kórsetti. Atalǵan komandamen qazaqstandyq fýtbolshy 2023 jyldyń 18 tamyzynda kelisimshartqa qol qoıǵan edi. Kelisimshart 2027 jyldyń 30 maýsymyna deıin atalǵan klýb sapynda oınaýyna múmkindigi bar bolatyn. Túrkııalyq klýbta 27 jastaǵy otandasymyz 2023 jyldan beri 49 matchta bir gol soqty.