Baqsylar orman órtine jańbyr shaqyrý úshin Baıqalda bas qospaq
ChITA. TASS- QazAqparat – 4 tamyz kúni Býrıatııanyń, Zabaıkale men Irkýtsk oblysynan 40-qa jýyq baqsy Baıqaldyń Olhon aralynda arnaıy rásim ótkizý úshin jınalady. Olardyń pikirinshe, bul rásim Sibirde órtenip jatkan taıgaǵa jaýyn jaýǵyzýǵa kómektesedi. Bul jóninde sársenbi kúni TASS agenttigine «Tengerı» baqsylardyń aımaqaralyq uıymynyń Basqarma tóraǵasy Baır Tsyrendorjıev málim etti, dep habarlaıdy QazAqparat.
«Avıalesoohrana» federaldyq memlekettik mekemesiniń málimetinshe, Reseıde jalpy aýmaǵy 100 myń ga jerde 147 orman órti sóndirilip jatyr. Órtengen ormannyń basym bóligi shalǵaı mekenderde ornalasqan. Olardy sóndirýmen eshkim aınalysyp jatqan joq. Órtke oranǵan ormandardyń basym kópshiligi Sibirde – Irkýtsk oblysy men Krasnoıarsk ólkesinde tirkelgen.
«4 tamyz kúni Olhonda Býrıatııadan, Zabaıkale men Irkýtsk oblysynan 40-qa jýyq baqsy jınalady. Olar orman órtterine jańbyr shaqyrý úshin arnaıy rásim ótkizedi. Qazirgi tańda biz orman órtenip jatqan aýmaqtardy anyqtaýdamyz», - dedi Baır Tsyrendorjıev.
Seısenbi kúni býdda din qyzmetkerleri-lamalar dál solaı órtenip jatqan taıgaǵa jaýyn shaqyrý úshin rásim jasaýǵa daıyn ekenin málim etti, alaıda olar «órtengen ormandardyń naqty ornalasqan aýmaǵy» qajet ekenin atap ótti.
