Baqshadaǵy ýchaskesin súrýge kelispegen astanalyqtyń úıi men páteri bar - ákimdik
ASTANA. QazAqparat - Elordalyq ákimdik ótemaqy somasymen kelispeı, aktsııamen shyqqan, ózine qazaqstandyq BAQ-tyń nazaryn aýdartqan Nesipkúl Uıabaevany úıden shyǵarý jaıly pikirin bildirdi, dep habarlady «QazAqparat» HAA tilshisi.
Astanalyq turǵyn úı basqarmasy naqtylaǵandaı, 62 jastaǵy Raýshan Uıabaevaǵa tıesili «Maıskıı» baqsha seriktestigindegi ýchaske memlekettik qajettilikke oraı 240 oryndyq balabaqsha salý úshin májbúrli túrde alýǵa jatady. Ákimdik qaýlysy 2014 jylǵy qazanda kúshine endi.
2015 jyly Raýshan Uıabaevaǵa 4,700 mln teńge ótemaqy kólemi belgilendi.
«Bul soma 25 myń AQSh dollaryna teń jáne alynǵan múlik úshin ádil ótemaqy sanalady», - dep sanaıdy qala ákimshiliginde.
Budan basqa, turǵyn úı basqarmasynyń derekterine sáıkes Raýshan Uıabaeva oǵan tıesili jeke turǵyn úıde turyp jatyr.
Al Nesipkúl Uıabaevanyń menshik quqyǵynda basqa da jyljymaıtyn múlikter: jer ýchaskesi, páter tirkelgen. Astanada «Maıskııde» baqsha ýchaskesi jáne Jambyl oblysy Shý qalasynda jyljymaıtyn múlik nysany bar.
«Osyǵan qaramastan, Nesipkúl Uıabaeva nysandy alýǵa eshbir quqyǵynyń joqtyǵyna qaramastan, baqsha ýchaskesinde turyp jatyr. Elorda ákimdiginen turǵyn úı alýǵa tyrysýda.
Baqsha ýchaskelerinde salynǵan qurylys jeke jyljymaıtyn múlik nysany bolyp tabylmaıdy. Ýaqytsha qurylys mártebesi bar jáne maýsymdyq baqsha egý úshin paıdalanylýy tıis», - dedi ákimdikten.
Budan buryn Nesipkúl Uıabaeva qazaqstandyq BAQ-qa onyń úıi eki bólme ekenin, jeti adam turatynyn aıtqan. Ol kemi 50 sharshy metr alańmen ózi qalaǵan aýdannan páter berse ǵana súrýge úıdi beretinin aıtqan.
