Baqytjan Bazarbektiń qatysýymen bolǵan jol apaty: zardap shegýshi Tarazǵa jetkizildi
TARAZ. KAZINFORM – Eks-depýtat áleýmettik jelide zardap shekken jigitti tasymaldaý sátinen kadrlar jarııalap, onyń jaǵdaıynda oń klınıkalyq ózgerister bar ekenin habarlady, dep habarlaıdy Kazinform tilshisi.
Úsh mınýttyq vıdeo Qulandaǵy aýrýhananyń mańynan bastalady. Baqytjan Bazarbek 28 tamyzda Nurjigittiń (zardap shegýshiniń esimi) komaǵa túskenine 13 kún bolǵanyn aıtady.
– Onyń jaǵdaıynda birqatar oń klınıkalyq ózgeris bar. Bul týraly keıinirek aıtyp beremin, – dedi ol.
Eks-depýtat bul kúndi ózi jáne zardap shegýshiniń týystary úshin erekshe kún dep atady. Nurjigitti aýdandyq aýrýhananyń jansaqtaý bóliminen Taraz qalalyq aýrýhanasynyń jansaqtaý bólimine aýystyryldy.
Vıdeoda zardap shegýshiniń anasy da bar. Olar Tarazdan keletin reanımobıldi birge kútáp otyr. Bazarbektiń aıtýynsha, naýqasty jol boıy reanımatolog dáriger qarap kelgen.
Sońǵy kadrlar qalalyq aýrýhananyń aldynda túsirilgen. Reanımobıl medıtsınalyq mekeme aýmaǵyna kirip, keıin naýqas zembilmen ǵımarat ishine jetkizildi.
Bazarbek Nurjigitten qajetti taldaýlar alynǵanyn habarlady. Onyń aıtýynsha, naýqas Qulannan aman-esen jetkizilip, tasymaldaý onyń jaǵdaıyn nasharlatpaǵan.
– Endi Nurjigitpen qalanyń eń myqty reanımatologtary men travmatologtary aınalysady, – dedi Baqytjan Bazarbek.
Eske salaıyq, 15 tamyzda T.Rysqulov aýdanynda Toyota avtokóligi er adamdy qaǵyp ketken. Ol asa aýyr jaǵdaıda aýrýhanaǵa jetkizilip, keıin komada jatty jáne ókpeni jasandy tynys aldyrý apparatyna qosyldy. Jol apaty deregi boıynsha qylmystyq is qozǵaldy.
17 tamyzda eks-depýtat Baqytjan Bazarbek alǵash ret jol-kólik oqıǵasyna qatysty pikir bildirip, ony óziniń qatysýymen bolǵan jol apaty dep atady. Ol zardap shegýshiniń otbasyna kómektesip jatqanyn aıtyp, tergeý qorytyndysyn kútýdi surady.
