Baqytjan Bazarbek: Úkimet jumysynyń basty nátıjesi —halyqtyń rızashylyǵy
ASTANA. KAZINFORM – Májilis depýtaty Baqytjan Bazarbek otstavkaǵa ketken Úkimettiń jumysyna halyq qalaýlysy retinde óz baǵasyn berip, jańa Úkimettiń basty mindetin atady.
«Keshe otstavkaǵa ketken Úkimet basshysynyń kandıdatýrasyn bekitken kezde qarsy daýys bergen 5 depýtattyń biri men edim. Sebebi kóp másele sheshilgen joq. Basqa salalarǵa toqtalmaı-aq qoıaıyn, jer máselesine kelsek. Turǵyn úı salýǵa beriletin 10 sotyq jer máselesi sheshilmedi, qurylys salasynda sybaılas jemqorlyq beleń alyp otyr. Seısmıkalyq qaýipti aımaqtardyń tótenshe jaǵdaılarǵa daıarlyǵy óte tómen. Almaty qalasy jer silkinisine tipti daıyn emes. Qazir bizdiń qaraýymyzǵa qurylys kodeksi kirdi. Jer silkinisine daıyn emes, bul kimniń jaýapkershiligi? Árıne, Úkimettiń jáne quzyrly mınıstrliktiń. Osyǵan oraı shuǵyl sheshimder qabyldaý qajet. Ókinishke qaraı, jer jáne qurylys salasynda tıisti sharalar qabyldanbaýy sebebinen sybaılas jemqorlyq, qurylys lobbıi, ónerkásipterdiń sanıtarlyq talaptardy buzýy bolyp otyr. Ekologııalyq jáne sanıtarlyq talaptardy buzyp, jappaı turǵyn úı salynyp jatyr. Ol úılerdiń qaýipsizdigine eshkim jaýap bere almaıdy. Osylardyń bári jer, qurylys salasynda ketken saıası qatelikterdiń kórinisi», - dedi Baqytjan Bazarbek.
Onyń aıtýynsha, otstavkaǵa ketken Úkimet artqan úmitti aqtaǵan joq.
«Men táýelsiz depýtatpyn, óz oıymdy táýelsiz aıtamyn. Halyqtyń jaǵdaıyn kórip otyrmyz, onsha emes. Baǵa qymbattap jatyr. Ózińiz bilesiz, áleýmettik jobalardy iske asyrý úshin Ulttyq qordan trıllıondaǵan qarjyny alyp jatyrmyz. Ulttyq qordan ala bersek, erteń ne qalady? Bolashaq urpaqqa ne qaldyramyz? Ónerkásip salasy da sol, bári munaıǵa qarap otyr, sony óndirip shyǵaramyz. Jańa ónerkásip oshaqtaryn ashpaımyz. Ashsaq, olarǵa jabylý qaýpi tónip otyr. Oǵan memlekettiń tıisti qorǵaý amal-sharttary jetkiliksiz. Otstavkaǵa ketken Úkimettiń is áreketteri baıaý boldy, ol úshin jedel qımyldaý kerek edi», - dedi ol.
Sondaı-aq, halyq qalaýlysy keıbir ákimder bıýdjettik baǵdarlamany oryndamaı, sonyń saldarynan sógis alǵanyn aıtty.
«Jer, men qurylys salasyna mıllıardtaǵan qarjy bólindi, biraq ákimdikter jumysty sozyp jiberdi, keıbir aqshanyń qaıda ketkenin biz bilmeımiz. Jumystyń eń basty nátıjesi halyqtyń rızashylyǵy», - deıdi B.Bazarbek.
Odan bólek, táýelsiz depýtat jańa Úkimetten qandaı úmit kútetinin aıtty.
«Jańadan taǵaıyndalatyn Úkimet aldymen «halyq» degendi bilý kerek. «Halyq» sózi bes árip, biraq sonyń ishinde kóp nárse jatyr. ıAǵnı halyqtyń muń-muqtajy, áleýmettik jaǵdaıy men tirshilik etý jaı-kúıi birinshi kezekte turýy tıis. Eger Úkimet aldymen statıstıkany qoıyp, halyqty keıinge qoısa, odan eshteńe shyqpaıdy. Halyq – Úkimettiń basty maqsaty bolý kerek», - dep tolyqtyrdy Májilis depýtaty.
