Baqytjan Bazarbek: Sottar áli ádildikti qorǵaıtyn ınstıtýtqa tolyq aınalǵan joq

ASTANA. KAZINFORM – Májilis depýtaty Baqytjan Bazarbek palatanyń jalpy otyrysynda sot júıesinde sheshimin tappaı otyrǵan máselelerdi atady.

— Sottardyń zańdy kúshine engen sheshimderi oryndalmaı keledi. Sebebi barshańyzǵa belgili. Ol úshin zańnamany áli de jetildirýimiz qajet, kem tustaryn qoǵamnyń búgingi suranystaryna saı ózgertý mańyzdy.

Máselen, ózim Májilistiń qabyldaý bólmesinde bir kúnde 160-tan astam azamatty qabyldadym. Bul Parlamentke degen senim bolǵanymen, jergilikti jerde sheshilýi tıis máseleler tıisinshe júzege aspaı, ortalyqqa deıin jetip jatyr degendi bildiredi, - dedi depýtat. 

Onyń oıynsha, bulaı bolmaý úshin jergilikti organdardyń jaýapkershiligi men jumysyn kúsheıtý kerek. 

— Sot — ádildiktiń, aqıqattyń, eń bastysy, adamnyń quqyqtaryn jan-jaqty qorǵaıtyn ınstıtýtqa aınalýy tıis. Ázirshe, bul tolyǵymen iske aspaı otyr. Taǵy bir túıtkil, qoǵamda másele sheshkish deldaldardyń, ıaǵnı «pomogaıkalardyń» kóbeıip ketýi. Bul boıynsha da ádil sheshim qabyldap, olarǵa zańmen tosqaýyl qoıǵan jón, - dedi Baqytjan Bazarbek.

Aıta keteıik, búgingi Májilis jıynynda Prezıdent Qasym-Jomart Toqaevtyń saıası reformasy talqylanyp jatyr. Oǵan palata depýtattarynan bólek, ǵalymdar men sarapshylar, BAQ basshylary qatysyp otyr.