Baqytjan Bazarbek «SQ-Farmatsııa» isi jóninde: jaqynda tyń derekter jarııalanady
ASTANA. KAZINFORM – Májilis depýtaty Baqytjan Bazarbek Áleýmettik medıtsınalyq saqtandyrý qoryndaǵy (ÁMSQ) urlyq faktileri, sondaı-aq «SQ-Farmatsııa» kompanııasyna qatysty júrgizilip jatqan tergeý boıynsha pikir aıtty.
Eskes salsaq, byltyr Májilis depýtaty Baqytjan Bazarbek áriptesi Murat Ábenovpen birge bergen ótinish negizinde «SQ-Farmatsııa» JShS qatysty tergeý bastalǵanyn habarlaǵan bolatyn.
— «SK-Farmatsııa» boıynsha jaqynda aqparat bolady. Qylmystyq is qozǵaldy, tergeý amaldary júrip jatyr, - dedi B. Bazarbek Parlament Májilisinde tilshiler suraǵyna jaýap bere otyryp.
Sonymen qatar ol Áleýmettik medıtsınalyq saqtandyrý qoryna (ÁMSQ) qatysty aıta kele, qordan qarajat shyǵarý deregi boıynsha Bas prokýratýraǵa aryz daıyndap jatqanyn habarlady.
— Áli quqyqtyq baǵa berilmegen faktiler boıynsha osy aptada Bas prokýratýraǵa ótinish jiberemiz. Osy ýaqytqa deıin jaýapkershilikke tartylmaǵan adamdar bar, ıaǵnı MÁMS júıesinde jumys istemeıtin laýazymdy adamdar týraly aıtyp turmyn. Olar jaýapkershilikke tartylýy tıis. Aqsha urlanǵan, sondyqtan ádil jaza bolýy kerek, - dedi depýtat.
Aıta keteıik, búgin Úkimet basshysy Oljas Bektenov medıtsınalyq saqtandyrý qoryndaǵy jemqorlyqqa qatysty pikir aıtyp, kináliler jaýapqa tartylatynyn málim etti.
Byltyr kúzde Qarjylyq monıtorıng agenttigi «SQ-Farmatsııa» kompanııasyna qatysty bıýdjet qarajatyn jymqyrý faktisi boıynsha tergeý júrgizip jatqany aıtyldy.
