Baqytjan Bazarbek: Prokýrorlar alıaqtyq jasady dep aıyptaǵan 29 jeke sot oryndaýshy áli jumys istep júr

ASTANA. KAZINFORM – Májilis depýtaty Baqytjan Bazarbek Ádilet mınıstri Erlan Sársembaevtyń zań buzǵan jeke sot oryndaýshylardyń saladan shettetilgeni týraly málimetine kúmán keltirdi.

- Prokýrorlar biraz sot oryndaýshysynyń áreketinen alaıaqtyq faktilerin anyqtaǵan bolatyn. Soǵan baılanysty keıbir sot oryndaýshynyń qyzmetin toqtatqandaryńyzdy aıttyńyz. Fakti óte kóp – 660. Prokýratýranyń 2022 jylǵy 5 shildesindegi sol kezdegi Ádilet mınıstri Qanat Mýsınge joldaǵan usynymy boıynsha 29-ǵa jýyq sot oryndaýshy lıtsenzııasynan aıyrylýy kerek bolǵan. Árqaısysynyń saıtyna kirdik. Qazir jumys istep jatyr. Sonda qaı sot oryndaýshyny lıtsenzııasynan aıyryp otyrsyz? Bular jumys istep jatyr ǵoı. Jekelep aıtsaq, aqsha urlap, alaıaqtyq jasaǵan sot oryndaýshylar áli jumys istep júr. 2Gis-ti de ashyp qaradyq, jumys isteıdi. Prokýratýranyń usynymyn oryndaýǵa mindettisizder, - dedi depýtat Úkimet saǵatynda.

Mınıstr lıtsenzııadan aıyrý jazasyn sot sheshimi arqyly ǵana qoldanýǵa bolatynyn, sýdıa ondaı usynymdy qoldamasa, oryndaý múmkin emes ekenin eske saldy.

- Siz aıtqan derekter ras bolsa, ár keıs boıynsha aty-jónin tektep otyryp, tekserýge daıynmyn. Bul jerde adam faktory bolýy múmkin ekenin teristeı almaımyn. Biraq ár jaǵdaı boıynsha ádilet organdary sotqa júgingenin aıtqym keledi. Al sońǵy núkteni tek sot qoıady, - dedi Erlan Sársembaev.

Osy jıynda shaǵyn nesıesin ótemegen azamattardyń 2,5 mln qujaty jeke sot oryndaýshylardyń qolynda júrgeni málim boldy.