Baqytjan Bazarbek mınıstr Q.Sharlapaevpen aradaǵy daý týraly: Bas prokýrorǵa júginemin

ASTANA. KAZINFORM — Májilis depýtaty Baqytjan Bazarbek Qurylys kodeksin ázirleýge jumsalǵan qarajattyń daýy boıynsha Bas prokýrorǵa shaǵymdanatynyn aıtty.

«Sharlapaev (Ónerkásip jáne qurylys mınıstri Qanat Sharlapaev — red.) myrza moıyndamaı otyr. Men óz ustanymymda nyq qala beremin. Bıýdjet zańnamasy buzyldy. Bıýdjet shyǵyndaldy, al onyń negizdi ekenin qujatpen dáleldenbegen. Qarjy mınıstrligi ondaı zań buzý faktisi bolǵanyn rastady. Sharlapaev myrza kerisinshe teriske shyǵaryp júr. Endi biz Ónerkásip jáne qurylys mınıstriniń nusqaýdy oryndaǵanyn kútemiz. Qarjy mınıstrligi jol berilgen zań buzý faktilerin joıý týraly nusqaý joldaǵan», — dedi ol jýrnalıst suraǵyna bergen jaýabynda.

Depýtat bul is boıynsha quzyrly organdarǵa shaǵymdanyp jatqanyn aıtty. 

«Básekelestikti qorǵaý jáne damytý agenttigine hat joldadyq. Olar da Ónerkásip mınıstrligine qatysty akt rásimdeýi kerek. Men Bas prokýrorǵa júginemin. Bolyp jatqany dúnıeni ádiletti dep oılamaımyn», — dedi depýtat.

Buǵan deıin Premer-mınıstr Oljas Bektenov Májilis depýtaty Baqytjan Bazarbektiń Qurylys kodeksiniń jobasyn ázirleý kezinde zańsyzdyqtarǵa jol berilgeni týraly saýalyna jaýap bergen edi.