Baqytjan Bazarbek qatysqan jol apatynan zardap shekken azamat komadan shyqty
ASTANA. KAZINFORM – Eks-májilismen Baqytjan Bazarbek qatysqan jol-kólik oqıǵasynan keıin aýyr jaǵdaıda jatqan Nurjigit 24 kúnnen soń esin jıdy. Degenmen alǵan jaraqatyna baılanysty onyń jaǵdaıy áli de aýyr.
Bul týraly Baqytjan Bazarbek áleýmettik jelidegi paraqshasynda habarlady.
– Nurjigit oıandy, esin jıdy. Ol anasyn, áıelin, balalaryn, baýyrlaryn jáne basqa da týystaryn tanyp jatyr, – dep jazdy eks-depýtat.
Jambyl oblysynyń densaýlyq saqtaý basqarmasy da naýqastyń jaǵdaıynda oń ózgeris bar ekenin rastady. Alaıda oǵan áli de em qajet.
– Naýqastyń jalpy jaǵdaıy alǵan jaraqatyna baılanysty aýyr kúıinde qalyp otyr. Degenmen júrgizilip jatqan terapııa aıasynda oń dınamıka baıqalady. Dárigerler emdeý sharalaryn tolyq kólemde jalǵastyryp, naýqastyń jaǵdaıyn jiti baqylaýda ustap otyr, – dep habarlady vedomstvo.
Baqytjan Bazarbek Taraz qalasyndaǵy reanımatolog Gamzat Mýsın men anestezıolog-reanımatologtar komandasynyń eńbegin erekshe atap ótti.
Sondaı-aq eks-depýtat Nurjigittiń jaǵdaıy týraly aqparatty burmalamaýdy jáne shyndyqqa sáıkes kelmeıtin málimet taratpaýdy surady. Ol zardap shekken azamat pen onyń jaqyndaryna qoldaý bildirgen jurtqa alǵys aıtty.
Eske salaıyq, 15 tamyzda Jambyl oblysynyń T.Rysqulov aýdanynda Toyota avtokóligi er adamdy qaǵyp ketken. Zardap shekken azamat jansaqtaý bólimine jetkizildi.
17 tamyzda Baqytjan Bazarbek jol apatyna óziniń qatysy bar ekenin alǵash ret málimdedi.
28 tamyzda zardap shekken azamat Qulannan Taraz qalalyq aýrýhanasynyń jansaqtaý bólimine aýystyryldy.
