Baqytjan Bazarbek bıýdjet qarajatyn jymqyrý faktisi boıynsha Bas prokýratýraǵa 4 aryz beredi

ASTANA. KAZINFORM - Májilis depýtaty Baqytjan Bazarbek bıýdjet qarajatyn jymqyrý faktisi boıynsha Bas prokýratýraǵa 4 aryz beredi.

Onyń atap ótýinshe, aryzdar mynadaı 4 baǵytqa qatysty: «SQ-Farmatsııa» men iri farmatsevtıkalyq kompanııalar qyzmetin qosa alǵanda atalǵan salaǵa júrgizilgen aýdıt nátıjeleri, Mindetti áleýmettik medıtsınalyq saqtandyrý júıesi aıasynda qarajat jymqyrý, aýyl sharýashylyǵynda sýbsıdııa bólý máselesi, sondaı-aq 27 maýsymda maquldanǵan Úkimet esebi.

— Qazir Joǵary aýdıtorlyq palatanyń farmatsevtıka salasyna júrgizgen aýdıtor qorytyndysy boıynsha Bas prokýratýraǵa aryz daıyndap jatyrmyn. Sonymen qatar MÁMS boıynsha aqsha qarajattaryn jymqyrǵan sýbektilerge qatysty aryz daıyndalyp jatyr. Aýyl sharýashylyǵyndaǵy sýbsıdııa men Úkimet esebi boıynsha da jekelegen aryz bar. Barlyǵy 4 baǵytta, — dedi ol Parlament palatalarynyń birlesken otyrysy aıasynda BAQ ókilderine bergen suhbatynda.

Depýtat atalǵan aryzdardy Parlamenttiń 5-sessııasy aıasynda sońyna deıin iske asyrýǵa nıetti ekenin aıtty.

— Biz qylmystyq is qozǵaýǵa, tekserý júrgizýge, áshkereleýge jáne tutqyndaýǵa qol jetkizemiz. Bas prokýratýramen jumysty sońyna deıin aparamyz, — dedi Baqytbek Bazarbek.

Májilis depýtaty aryz shilde aıynyń sońynda beriletindigin aıtady. Al aryz mátini Facebook, Instagram jáne TikTok áleýmettik jelilerinde jarııa etiledi.

Aıta keteıik, búgin Parlament palatalarynyń birlesken otyrysy ótip, onda segizinshi saılanǵan Parlamenttiń úshinshi sessııasy resmı túrde jabyldy.