Baqytjan Bazarbek: Bankter 10 mln gektar jerdiń qupııasyn memleketke ashpaı otyr

ASTANA. KAZINFORM – Májilis depýtaty Baqytjan Bazarbek «bank qupııasy» uǵymynyń saldarynan 10 mln gektar jerdiń memleketke qaıtarylmaı jatqanyn málim etti.

- Zań jobasyndaǵy 69-bapty alaıyq. Bankter memlekettik organdar suraý salǵan jaǵdaıda múlik málimetteri týraly bank qupııasyn beretini aıtylǵan. Qazir bizdiń memorgandar suraý jiberip jatyr. Biraq bári «bank qupııasy» dep boıyn aýlaq alyp qashady. Osy zań jobasynda «bank qupııasy» degen kedergini aınalyp ótetin shyǵarmyz dep oılaǵanmyn. Mysaly, ıgerilmeı jatqan jerlerdi qaıtarý kezinde myna máselege tap boldyq. 5-ten 10 mln gektarǵa deıin jer ekinshi deńgeıli bankterdiń qolynda qalyp otyr. Ol alqaptardy memleketke qaıtaryp, aınalymǵa shyǵara almaı otyrmyz. Óıtkeni bankter memlekettik organdarǵa «bank qupııasyna» súıenip jaýap bermeı otyr. Jer kodeksiniń 93, 94-baptarynda bankter 6 aıdan astam ýaqyt ıgermegen jerdi memleketke qaıtarý kerektigi aıtylǵan. Zań jobasynyń 69-baby ol normaǵa qaıshy, - dedi Baqytjan Bazarbek.

Qarjy naryǵyn retteý jáne damytý agenttiginiń tóraıymy Mádına Ábilqasymova bank qupııasyn ashýǵa negiz bolatyn talaptar tizbesi bar ekenin, ózi tanystyrǵan zań jobasy arqyly ol tizbeni keńeıtýge eshqandaı qajettilik joq dep esepteıtinin aıtty.

- Degenmen naqty jer telimderine qatysty máseleni sheshýdiń basqa joldary bar. Kimniń ıeliginde qansha jer bar ekenin bilýge, ol týraly málimetterdi memlekettik organdarǵa berýge bolady, - dedi agenttik basshysy.

Aıta keteıik,  Ulttyq bank pen Qarjy naryǵyn damytý jáne retteý agenttigi Májiliste bankter týraly zań jobasy tanystyrdy.