Baqytjan Bazarbek aldaǵy referendým jóninde: Parlamentke qatysty sheshimdi halyq jasaıdy

ASTANA. KAZINFORM — Májilis depýtaty Baqytjan Bazarbek Memleket basshysynyń bir palataly Parlament qurý úshin 2027 jyly jalpyulttyq referendým ótkizý jónindegi usynysyna pikir aıtty.

- Eger bir palataly Parlament qurylsa, qarajat únemdeledi. Bul turǵyda depýtattar sany da ózgerýi múmkin. Qazir aldyn ala paıym jasaý qıyn. Aldymen, 2027 jylǵy referendýmdy kúteıik. Referendýmda halyq qalaı sheshse, solaı bolady, - dedi B. Bazarbek Prezıdent Joldaýynan keıin tilshiler suraǵyna jaýap bere otyryp.

Osy oraıda depýtat qazir Parlament Májilisi de, Senat ta óz qyzmetin oryndap jatqanyn, qos palata mıssııasyn tıisti deńgeıde atqaryp otyrǵanyn aıtty.

- Biraq, biz saıası reformalarǵa kóshýimiz kerek. Bul rette, Prezıdenttiń búgingi bastamasyn tolyǵymen qoldaımyn. Memleket basshysy Joldaý barysynda parlamenttik reformaǵa erekshe toqtaldy. Sondyqtan referendýmnan keıin kóp nárse ózgerýi múmkin, - dedi Baqytjan Bazarbek.

Budan buryn habarlanǵandaı, búgin Prezıdent Qasym-Jomart Toqaev Qazaqstan halqyna Joldaýy barysynda bir palataly Parlament qurý týraly bastama kóterdi.

Memleket basshysy ótken 30 jylda Senat asa mańyzdy tarıhı mıssııasyn abyroımen atqaryp shyqqanyn aıtty.