Baqytjan Baıjanov amnıstııa boıynsha bostandyqqa shyqty
ASTANA. KAZINFORM - Baqytjan Baıjanov jańa Konstıtýtsııanyń qabyldanýyna baılanysty jarııalanǵan amnıstııa aıasynda bostandyqqa shyqty. Alaıda sot sheshimimen ol aldaǵy alty jyl boıy probatsııalyq baqylaýda bolyp, ákimshilik qadaǵalaýǵa alyndy. Bul týraly QR ІІM Qylmystyq-atqarý júıesi komıteti habarlady.
Sot Baqytjan Baıjanovqa «Qazaqstan Respýblıkasynyń jańa Konstıtýtsııasynyń qabyldanýyna baılanysty raqymshylyq jasaý týraly» zańdy qoldaný jóninde qaýly shyǵaryp, sonyń negizinde ol bostandyqqa shyqty.
Sonymen qatar sot oǵan alty jyl merzimge probatsııalyq baqylaý men ákimshilik qadaǵalaý belgiledi.
Baıjanovtyń qorǵaýshysy Ǵazız Yntyqbaevtyń aıtýynsha, Stepnogor qalalyq soty búgin túske deıin qylmystyq-atqarý júıesi mekemesiniń usynysyn qarap, amnıstııany qoldaný týraly qaýly shyǵarǵan.
– Sot Baıjanovqa amnıstııa qoldaný týraly sheshim qabyldap, ony dereý bosatý qajet dep sheshken. Sottyń qaýlysy Stepnogordaǵy №4 mekemege túsken boıda Baıjanov birden bosatylýy tıis. Biz onyń búgin tústen keıin shyǵady kútip otyrmyz, – dedi qorǵaýshy.
Buǵan deıin de sot Baıjanovtyń jaza merzimin Konstıtýtsııanyń 30 jyldyǵyna oraı jarııalanǵan amnıstııa týraly zańǵa sáıkes qysqartqan bolatyn. Sol kezde onyń ótelmegen jaza merzimi úshten birge qysqartylyp, túpkilikti óteý merzimi 1 jyl 4 aı 17 kún bolyp belgilengen edi. Sonyń nátıjesinde ol 2027 jyldyń shildesinde emes, 2026 jyldyń qarashasynda bostandyqqa shyǵýy tıis bolǵan.
Eske salaıyq, 2024 jylǵy 13 mamyrda Qýandyq Bıshimbaev Saltanat Núkenovany azaptap, asa qatygezdikpen óltirgeni úshin 24 jylǵa bas bostandyǵynan aıyryldy. Al onyń týysy Baqytjan Baıjanov asa aýyr qylmysty jasyrǵany úshin tórt jylǵa sottalǵan bolatyn.
Buǵan deıin Baqytjan Baıjanovtyń raqymshylyqqa ótinish bergeni jaıly jazdyq.
