Baqytymdy memlekettik qyzmetten taptym — Jaırangúl Rahmanbergenova
PAVLODAR. KAZINFORM — Maı aýdanynyń halqyna qyzmetimen jaǵyp otyrǵan Jaırangúl Rahmanbergenova — baqytyn memlekettik qyzmetten tapqan jan. Ol týǵan ólkesiniń ıgiligi úshin 10 jyldan astam ter tógýde.
Jaırangúl Rahmanbergenova — aýdandaǵy ishki saıasat jáne tilderdi damytý bóliminiń basshysy qyzmetin abyroımen arqalap, búginde memlekettik qyzmet apparatyndaǵy bilikti mamandardyń aldyńǵy býynynda keledi.
Bul óńir sonaý keńes zamanynda atom synaqtarynan qatty zardap shekken aýmaq bolǵandyqtan sonaý toqyraý jyldary qatty júdep ketti.
Halyq sany azaıyp, aýyl sharýashylyǵy kúıreýdiń az-aq aldynda turdy. Tek keıingi jyldary ǵana munda sharýashylyqtar kóbeıip, eldegi sharýaqor azamattardyń arqasynda jergilikti ekonomıkanyń kóshi túzele bastaǵan.
Osy rette mal ósirip, dala tósine egin salǵan kópshiliktiń memleketten beriletin túrli ıgilikterdi paıdalanýy da zańdylyq qoı.
Al aýyldaǵy jurtqa memlekettiń járdemi men ishki baǵytta ustanǵan saıasatyn jetkizip, halyqty birlik-berekege uıytý — jergilikti memlekettik organdardyń mindeti.
Osy kóshte aýdandyq ishki saıasat jáne tilderdi damytý bóliminiń qyzmeti erekshe baıqalyp qalady.
«Aýyldan adam kóshkenmen, adamnan aýyl kóshpeıdi» degen danalyǵy bar ǵoı halqymyzdyń. Sol aıtqandaı, shalǵaı ketip bilim alyp, ózge aımaqta jumys istep júrsem de kóńilimniń túpkirinde týǵan jer, týǵan óńir turatyn. Jeke fırmalarda biraz ýaqyt eńbek etkende júrek qalaýym halyqpen aralasyp, qoǵam ıgiligi úshin qyzmet atqarý ekenin túsindim. Aqyry memlekettik qyzmette baǵymdy synaýǵa bel býdym. Alǵash 2012 jyly Aqtoǵaı aýdanynyń apparatyna zańger-bas maman bolyp qabyldansam, arada jyl ótkende Maı aýdanyndaǵy ákimdikke bas maman bolyp aýystym. Ol jerde biraz laýazymdy qyzmetterdi atqaryp, 2022 jyldan beri mundaǵy ishki saıasat jáne tilderdi damytý bólimi basshysynyń qyzmetindemin. Kez kelgen tapsyrylǵan mindetti berilip, jurtqa qaıtse tıimdi bolady degen oımen isteımin. Nátıjesin kórip jatsam, qýanamyn. Qateligim bolsa, sabaq alamyn. Aldyńǵy býyn aǵa-apalarym septesip, kómek qolyn sozyp, qoldaýlaryn tyıǵan emes. Mundaı jaǵdaıda jumys isteý isime shabyt bitirip, qanattandyrady. Árıne, aýyldyń órkendeýine az da bolsa úlesimizdi qossam, men úshin odan artyq baqyt joq. Aldyma másele aıta kelgen adamǵa joq degen sóz aıtpaımyn, hal-qadirimizshe kómektesip, baǵytyn kórsetip jiberemiz, -deıdi ol.
Sońǵy jyldar deresinde elimizdiń ómiri úshin asa mańyzdy bolǵan túrli saıası naýqandardy Jaırangúl kóppen birge oıdaǵydaı atqarysty.
Prezıdent, Parlament depýtattarynyń saılaýy, aýyl ákimderin saılap qoıý sııaqty mańyzdy saıası qadamdardyń ıgiligi jergilikti jurtqa parasatty turǵydan durys jetkizildi.
Nátıjesinde halyq naýqandarǵa asa uıymshyldyqpen qatysqanyn kóz kórdi. Budan bólek Memleket basshysynyń halyqqa arnaıtyn Joldaýlaryn, QR Úkimetiniń baǵdarlamalaryn túsindirý men nasıhattaý, aýdan ákimi qyzmetiniń negizgi baǵyttaryn júzege asyrýdaǵy uıymdastyrý-ıdeologııalyq sharalardy qamtamasyz etý, jergilikti akparat quraldarynyń memlekettik tapsyrystardy júzege asyrýyn úılestirý, qoǵamdyq uıymdarmen, dinı birlestiktermen, saıası partııalarmen aradaǵy baılanysty qalyptastyrý, taǵysyn-taǵy tolyp jatqan mindetter bar bólim jaýapkershiliginde.
«Meniń oıymsha, kez kelgen memlekettik is-shara elimizde turatyn árbir azamat qalys qalmaıtyndaı etip ázirlenýi kerek. Máselen, sońǵy jyldary aýdan ákimi Aǵybaı Ámirınniń ıdeıasymen óńirde qanshama kreatıvti bastamalar qolǵa alyndy. Sonyń ishinde halyqty salamatty ómir saltyna shaqyratyn is-sharalar kóbeıdi. Memlekettik rámizder kúnine oraı aldyńǵy jyly motosherý, byltyr avtosherý ótkizsek, bıyl velosherý uıymdastyrdyq. Oǵan kásibı sportshylardan bastap, túrli salanyń ókilderi, dáriger, memlekettik qyzmetshi, qarapaıym jumyskerler, jastar ókilderi qatysty. Aýdanda 10 myńǵa jýyq halyq tursa, solardyń belgili bir toby merekelerde qamtylyp otyrady. Erekshe atap ótetin úrdis, qazir memlekettik apparatta, polıtsııada, medıtsına salasynda jastardyń býyny kóbeıgen. Jastar bolǵan jerde tyń bastamalar jıi baıqalyp turady. Aýdandaǵy is qaǵazdary 100 paıyz memlekettik tilge kóshken. Halyqtyń negizgi bóligin ózimizdiń qarakózderimiz quraǵandyqtan, memlekettik tildiń qoldanysyna qatysty másele týyndap kórgen emes», -deıdi ol.
Áńgime barysynda memleketimizde qolǵa alynǵan merıtokratııa júıesin odan ári damytýdy quptaıtynyn, sebebi kóp jastar qyzmet oryndarynda jyljymaı otyryp qalǵanyna ishi ashıtynyn jetkizdi.
Jaırangúldiń ózi de aýdan ákimdiginiń apparatynda bir orynda 10 jyldan astam turaqtap qalǵan. Jańa Qazaqstandy damytamyz desek ozyq oıly jastardy túrli salada synap, qyzmet oryndarynda órleýine jol ashýymyz kerek dep esepteıdi.
Aıtyp óteıik, J.Rahmanbergenova joldasy Dastan ekeýi otbasynda bir ul, eki qyz tárbıelep otyrǵan ónegeli otbasy. Dastan aýdandyq jergilikti polıtsııa bólimi bastyǵy laýazymyn abyroımen atqaryp júrgen azamat.
Eske sala keteıik, elimizde memlekettik qyzmetshilerdiń bás tigýine jáne býkmekerlerdi jarnamalaýǵa tyıym salyndy.
