Baqytgúl Hamenova jazasyn túrmede emes, úıde óteıtin boldy
ATYRAÝ. KAZINFORM — Atyraý qalasynyń № 2 soty buryn para alý deregi boıynsha sottalǵan Atyraý oblysy ákiminiń orynbasary bolyp jumys istegen Baqytgúl Hamenovanyń jazasyn ózgertý týraly sheshim qabyldady.
Oblystyq sottyń baspasóz qyzmetiniń málimetinshe, probatsııa qyzmeti sotqa jazany bas bostandyǵyn shekteý túrine aýystyrý týraly usynyspen júgindi. Usynysta jazany óteýdi keıinge qaldyrý merzimi aıaqtalǵany, osy kezeńde Hamenovanyń oń minezdeme alǵany, qoǵamdyq tártipti buzbaǵany, ákimshilik jaýapkershilikke tartylmaǵany, sondaı-aq bala tárbıesi boıynsha mindetterin tıisinshe oryndaǵany kórsetilgen.
Sot barlyq mán-jaıdy eskere otyryp, QR QK-niń 74-baby 3-bóligine sáıkes probatsııa qyzmetiniń usynysyn qanaǵattandyrdy. Naqtyraq aıtqanda, taǵaıyndalǵan jazanyń ótelmegen bóligin 7 jyl merzimge bas bostandyǵyn shekteýge aýystyryp, probatsııalyq baqylaý belgilendi.
2022 jyldyń 15 qarashasynda Atyraý qalalyq № 2 sotynyń úkimimen Baqytgúl Hamenova Qylmystyq kodekstiń 366-baby 3-bóliginiń 2-tarmaǵy boıynsha kináli dep tanylyp, belgili bir laýazymdardy atqarý quqyǵynan ómir boıyna aıyryldy. Sondaı-aq oǵan 7 jyl bas bostandyǵynan aıyrý jazasy taǵaıyndalyp, QK-niń 74-baby 1-bóligi negizinde, ıaǵnı balalarynyń bolýyna baılanysty jazasyn óteý úsh jylǵa keıinge qaldyryldy.
Baqytgúl Hamenova 2023 jylǵy 10 naýryzdan beri Atyraý qalalyq probatsııa qyzmetiniń esebinde tur.
Jaza óteý merzimi 2026 jylǵy 10 naýryzda aıaqtaldy.
Іs materıaldaryna sáıkes, para kólemi 4,5 mln teńge. Qarajat Abaı Qunanbaevqa eskertkish ornatý jobasyna qatysty alynǵan. Bul iske qatysy bar sol kezdegi mádenıet basqarmasynyń basshysy Aqylbek Rysqalıev 7 jylǵa, al eskertkishti jasap, ony ornatýǵa jaýapty merdiger kompanııanyń basshysy Ómirtaı Adamov 4 jylǵa bas bostandyǵynan aıyrylǵan.
2023 jyldyń aqpanynda qylmystyq is Atyraý oblystyq sotynyń apellıatsııalyq alqasynda qaıta qaralyp, basqarma jetekshisi men seriktestik dırektorynyń jazasy jeńildetildi. Al aımaq basshysynyń orynbasary bolǵan Baqytgúl Hamenovaǵa taǵaıyndalǵan jaza ózgerissiz qalǵan edi.
Buǵan deıin áleýmettik jelilerde onyń saltanatty sharaǵa qatysqan vıdeosy taraǵan edi. Bas prokýratýra bul jaǵdaıǵa qatysty túsinikteme berip, probatsııa qyzmetiniń ruqsaty bolǵanyn jáne zań buzýshylyq tirkelmegenin habarlaǵan.