Baqytgúl Hamenova toıǵa barýǵa probatsııa qyzmetinen ruqsat aldy - Bas prokýratýra
ASTANA. KAZINFORM — QR Bas prokýrorynyń orynbasary Ǵalymjan Qoıgeldıev sottalǵan B. Hamenovanyń toıda júrýi oqıǵasyna qatysty túsinik berdi.
Para alǵany úshin sottalǵan Atyraýda oblys ákiminiń burynǵy orynbasary, eks-depýtat Baqytgúl Hamenovanyń jaqynda toıǵa júrgen sáti áleýmettik jelide jarııalanǵan edi.
- Hamenovaǵa qatysty toqtalsaq, onyń jazasy boıynsha úkimniń oryndalýy úsh jylǵa keıinge qaldyrylǵan edi. Jalpy, keıinge qaldyrý onyń is-sharalarǵa qatysýyna tyıym salmaıdy. Sonymen qatar ol probatsııa qyzmetinen ruqsat alǵan, - dedi Ǵ. Qoıgeldıev Senattyń jalpy otyrysynan keıin tilshiler suraǵyna jaýap bere otyryp.
Eske sala keteıik, 2022 jyly kúzde Baqytgúl Hamenova Abaı eskertkishin ornatý kezinde 4,5 mıllıon teńge kóleminde para alǵany úshin 7 jylǵa bas bostandyǵynan aıyrylǵan bolatyn.
Sot sheshimimen ol memlekettik qyzmette jumys isteý quqyǵynan aıyrylyp, múlki tárkilengen. Atyraý oblystyq soty bul jaıtqa qatysty úkimniń oryndalýyna qatysty mán-jaıdy eske saldy. Úkimniń oryndalýy 3 jyl merzimge keıinge qaldyrylǵan. Bul sheshim sottalýshynyń asyraýyndaǵy eki jas balasynyń bolýyna baılanysty qabyldandy.