Baqytgúl Hamenova qashannan bastap jazasyn óteıdi

ASTANA. KAZINFORM — Baqytgúl Hamenova Atyraý qalalyq probatsııa qyzmetiniń esebinde tur. Bul týraly Atyraý oblysy boıynsha qylmystyq atqarý júıesi departamentiniń bastyǵy Azamat Іztileýov málimdedi.

— 2022 jylǵy 15 qarashada Atyraý qalalyq № 2 sotynyń úkimimen Baqytgúl Hamenova Qylmystyq kodekstiń 366-baby 3-bóliginiń 2-tarmaǵy boıynsha kináli dep tanylyp, belgili bir laýazymdardy atqarý quqyǵynan ómir boıyna aıyryldy. Sondaı-aq oǵan 7 jyl bas bostandyǵynan aıyrý jazasy taǵaıyndalyp, QK-niń 74-baby 1-bóligi negizinde jazasyn óteý úsh jylǵa keıinge qaldyryldy, — dedi departament basshysy.

Onyń aıtýynsha, sottalǵan tulǵa 2023 jylǵy 10 naýryzdan beri Atyraý qalalyq probatsııa qyzmetiniń esebinde tur.

— Jaza óteý merzimi 2026 jylǵy 10 naýryzda aıaqtalady. Sot úkimi boıynsha ol bala tárbıesimen aınalysýǵa tıis, — dedi Іztileýov.

Sondaı-aq ol jazany odan ári qaraı óteý tártibi QR QK-niń 74-baby 3-bóligine sáıkes sot sheshimimen aıqyndalatynyn atap ótti.

— Jaza óteý merzimi aıaqtalǵannan keıin probatsııa qyzmeti sotqa usynym joldaıdy. Sot onyń minez-qulqyna qaraı jazadan bosatý, jazany jeńil jazaǵa aýystyrý nemese jazany óteý úshin tıisti mekemege jiberý jóninde sheshim qabyldaıdy, — dedi Azamat Іztileýov.

Buǵan deıin Atyraýda para alǵany úshin sottalǵan Baqytgúl Hamenova toıda kózge túsken edi.