Baqyt Sársekbaev: Jastar quramasy Taılandtaǵy týrnırde joǵary nátıje kórsetti
ASTANA. KAZINFORM – Bokstan Qazaqstan jastar quramasynyń bas bapkeri Baqyt Sársekbaev shákirtteriniń Bangkokta ótken Futures Cup halyqaralyq týrnırindegi nátıjesi jóninde pikir bildirdi.
Qazaqstandyq sportshylar halyqaralyq týrnırde 4 altyn, 4 kúmis, 3 qola medal jeńip aldy. Nátıjesinde medaldyq esepte ekinshi orynǵa ıe boldy. Otandastarymyz arasynan Dosjan Jumaqan (60 keli), Aıdana Ýbaıdýllaqyzy (80 keli), Hamza Maqsatuly (75 keli), Bıbarys Áshirbaı (70 keli) chempıon atandy.
Al Kamıla Ospanova (70 keli), Jalǵas Ýtebekov (90 keli), Tımýr Taıbekov (80 keli), Vladıslav Samojonov (90 keliden joǵary) kúmis medal alsa, Aqnur Tursynǵalı (57 keli), Zarına Tolybaı (75 keli), Nursultan Qystaýbaı (85 keli) jarysty qola júldemen aıaqtady.
– Halyqaralyq týrnırde qazaqstandyq boksshylar joǵary nátıjege qol jetkizdi degen oıdamyn. Olardyń jeke bapkerlerine raqmet aıtamyn. Alda turǵan josparlar bar. Bizdi jasóspirimder arasynda Olımpıada kútip tur. Sondaı-aq olar álem chempıonatynda synǵa túsýge múmkindik alady. Týrnır barysynda boksshylardyń daıyndyq barysyn tarazylap kórdik. Endigi kezekte jastarymyz qandaı qatelik jiberdi degen ahýal tóńireginde jumys isteımiz. Shákirtterime sáttilik tileımin. Olar bul jetistik úshin qanshama ter tókti. Sondaı-aq bizge qoldaý bildirgen jankúıerlerge alǵys bildirgim keledi, - dedi Baqyt Sársekbaev.
Halyqaralyq týrnırdiń medaldar kestesinde Ózbekstan, Qazaqstan, AQSh quramalary alǵashqy úsh oryndy ózara bólisse, Anglııa, Frantsııa, Samoa, Úndistan, Italııa, Ýkraına, Japonııa, Grýzııa boksshylary bir-bir márte jeńis tuǵyryna kóterildi.
