Baqyt Sársekbaev Qazaqstan jastar quramasynyń tizginin ustady
ASTANA. KAZINFORM - Qazaqstandyq belgili maman Baqyt Sársekbaev Qazaqstan jastar quramasynyń bas bapkeri qyzmetine taǵaıyndaldy. Bul jóninde elimizdiń boks federatsııasy málim etti.
Baqyt Sársekbaev qazirge deıin bul qyzmetti atqarǵan Maqsat Baqtybazarovtyń ornyn basty.
Sársekbaev Baqyt Abdrahmanuly 1981 jyldyń 29 qarashasynda dúnıege kelgen. 2008 jyly Beıjiń Olımpıadasynyń chempıony atansa, 2006 jyly Qatar astanasy Doha qalasynda Azııa oıyndarynyń jeńimpazy, úsh dúrkin Azııa chempıony boldy.
Tájirıbeli maman 2024 jyldyń jeltoqsan aıynan elimizdiń 22 jasqa deıingiler arasyndaǵy quramasynyń aǵa bapkeri qyzmetin atqarǵan edi. Federatsııa bul joba jumysyn toqtatatynyn málimdedi. Onda sheberligin shyńdaǵan boksshylar endi ulttyq qurama sapyna qosylady.
Aıta ketsek, búgin bokstan Qazaqstan erler quramasynyń bas bapkeri bolyp Nurjan Nasanov taǵaıyndaldy.
Bul qyzmetti 2024 jyldyń tamyz aıynan bastap atqarǵan Qaırat Sátjanov densaýlyq jaǵdaıyna baılanysty ornynan ketti.