Baqyt Nurmuhanov: Jańartylatyn Konstıtýtsııada prezıdenttik basqarý nysany saqtalady
ASTANA. KAZINFORM – Konstıtýtsııalyq reforma jónindegi komıssııanyń kezekti otyrysynda Konstıtýtsııalyq sot tóraǵasynyń orynbasary Baqyt Nurmuhanov Ata zań reformasy memlekettik basqarý qurylymyna qalaı áser etetinin aıtty.
– Jıyntyq jobanyń novellalary Qazaqstan Konstıtýtsııalyq materııasynyń negizin keńinen qozǵaıdy. Olar Ata zańnyń kelbetin, ishki qurylymyn túbegeıli ózgertedi. Instıtýtsıonaldyq, qurylymdyq qaıta túrlendirýler túbegeıli memlekettik quqyqtyq transformatsııalar úshin zor áleýet qalaıdy. Adam men azamattyń Konstıtýtsııalyq quqyqtary men bostandyqtaryn júzege asyrý jáne qorǵaý kepilderi eleýli túrde kúsheıtiledi. Prezıdenttik basqarý nysany saqtala otyryp, birtutas memlekettik bılikti uıymdastyrý joldary ózgeredi. Bir palataly Parlament modeli engiziledi. Azamattardyń memleket isin basqarýǵa qatysý nysandary keńeıedi. Quqyq qorǵaý tetikteri qyzmetiniń Konstıtýtsııalyq sottyń, Ata zańnyń negizinde quqyq ústemdigin qamtamsyz etýiniń tıimdiligi artady, - dedi Konstıtýtsııalyq sot tóraǵasynyń orynbasary.
Baqyt Nurmuhanovtyń aıtýynsha, Konstıtýtsııaǵa engiziletin jańashyldyqtar memlekettiń mıssııasyn, onyń fýnktsııalaryn jańasha túsinýge, memlekettik organdar, qoǵamdyq birlestikter men azamattardyń qarym-qatynasy qaǵıdattaryn anyq aıqyndaýǵa jol beretinin aıtady.
– Azamattyq qoǵam ınstıtýttarynyń memlekettik mańyzy bar mindetterdi sheshý isine qatysý múmkindikteri keńeıedi. Jobada negizgi qoǵamdyq saıası ınstıtýttardyń qyzmeti men bolashaǵyna qatysty qazirgi zamanǵy tujyrymdamalyq sıpattaǵy ustanymdar qarastyrylǵan. Komıssııa otyrystaryna shyǵarylǵan túzetýler óz jıyntyǵynda Konstıtýtsııanyń ózgertilgen normalarynyń jańasha mazmunyn aıqyndap qana qoımaı, redaktsııasy saqtalǵan erejelerdiń de quqyqtyq maǵynasyn jańalaıdy. Sondyqtan Konstıtýtsııanyń jáne onda kózdelgen ınstıtýttardyń túbegeıli túrlenýi men jańalanýy týraly nyq senimmen aıtýǵa bolady. Sonymen qatar, negizgi zańdy resmı túsindirý men qoldaný ustanymdarynyń da transformatsııalyq alǵysharttary jasalmaq, - dedi ol.
Jalpy Konstıtýtsııalyq komıssııa otyrysynda partııalar qandaı usynys aıtqanyn myna silteme arqyly oqýǵa bolady.