Baqyt Qajybaev Qytaıdaǵy ShYU elderi kınofestıvalinde «Úzdik akter» júldesin ıelendi
ASTANA. KAZINFORM - Qytaıdyń Chýntsın qalasynda ótken Shanhaı yntymaqtastyq uıymy (ShYU) elderi halyqaralyq kınofestıvaliniń saltanatty jabylý rásimi ótti.
QR Mádenıet jáne aqparat mınıstrligi málimetinshe, bıylǵy festıvalge qatysýshy memleketter eki tolyqmetrajdy fılmnen usynyp, negizgi «Altyn kamelııa» baıqaý baǵdarlamasyna qatysty. «Úzdik akter» atalymyn qazaqstandyq akter Baqyt Qajybaev ıelendi.
Bul marapat oǵan «Nabat operatsııasy» fılmindegi basty róli úshin berildi.
Akterdiń aıtýynsha, bul – tek óziniń ǵana emes, fılmge jan-tánimen eńbek sińirgen búkil shyǵarmashylyq toptyń jeńisi. Ol shynaıy oqıǵaǵa negizdelgen bul hıkaıany júzege asyrýdyń mańyzyn atap ótip, barlyq kórermenge alǵys bildirdi.
«Nabat operatsııasy» fılmi 1992 jyly Qazaqstanda bolǵan shynaıy oqıǵaǵa negizdelgen. Avtobýstaǵy 30 adamdy kepilge alǵan lańkesterge qarsy quqyq qorǵaý organdarynyń arnaıy operatsııasy adam shyǵynynsyz aıaqtalady.
Fılm Sh.Aımanov atyndaǵy «Qazaqfılm» kınostýdııasynda QR Mádenıet jáne aqparat mınıstrligi men Ulttyq kınony qoldaý ortalyǵynyń qoldaýymen túsirilgen.
Baıqaýǵa usynylǵan ekinshi qazaqstandyq týyndy – rejısser Darhan Tólegenovtiń «Aǵaıyndylar» dramasy. Bul fılm buǵan deıin 15-ten astam halyqaralyq marapatqa ıe bolǵan, onyń ishinde Oldenburg halyqaralyq kınofestıvalinde Spirit of Cinema Award júldesi bar.
Bıyl qazaq kınosy festıvaldiń fokýs-sektsııasyna usynylyp, «Aǵaıyndylar» fılmi arnaıy baǵdarlama aıasynda kórsetildi.
Baıqaý baǵdarlamasyn ShYU elderiniń tanymal kınematograftary, toǵyz adamnan quralǵan halyqaralyq qazylar alqasy baǵalady.
Festıval aıasynda kınonaryq uıymdastyryldy. Qazaqstannyń ulttyq stendinde Ulttyq kınony qoldaý ortalyǵy men Sh.Aımanov atyndaǵy «Qazaqfılm» kınostýdııasynyń negizgi kınojobalary usynyldy. Onda 25-ten astam kórkem, derekti jáne anımatsııalyq fılmniń treılerleri kórsetildi.
Chýntsındegi ShYU halyqaralyq kınofestıvali gýmanıtarlyq baılanystardy nyǵaıtýǵa, tájirıbe almasýǵa jáne ulttyq kınoóndiristi damytýǵa arnalǵan mańyzdy mádenı alańǵa aınaldy.
Baqyt Qajybaev «Mirjaqyp. Oıan, qazaq!» telehıkaıasynda basty róldi somdaǵanyn eske sala keteıik.
Aıta keteıik, Pavlodarda Sháken Aımanovtyń ómiri jaıynda jazylǵan «Suńǵyla» kitaby jaryq kórdi.