Baqyt Dosymovtyń kitaby jaryq kórdi
ASTANA. KAZINFORM – Balalar jazýshysy, Baýbek Bulqyshev atyndaǵy syılyqtyń laýreaty Baqyt Dosymovtyń(1959-1998) «Meıirbektiń kógershini» atty kitaby jaryq kórdi, dep habarlaıdy Kazinform tilshisi.
Qazaq ádebıeti tarıhynda Bernııaz Kúleev, Sultanmahmut Toraıǵyrov, Sattar Erýbaev, Ǵanı Muratbaev, Tólegen Aıbergenov jáne t.b. ómirden erte ozǵan aqyn, pýblıtsıst, jazýshylar shoǵyry bar. Osynaý shoǵyrdyń ishinde 39 jasynda baqıǵa sapar shekken Baqyt Dosymovtyń da esimi jıi atalady.
Baqyt Dosymov – ádebıetke ert kelgen qalamger. Ol oqýshy kezinde-aq «Qazaqstan pıoneri» («Ulan») gazeti arqyly tyrnaqaldy maqalalary, áńgimelerimen tanymal boldy. QazMÝ-diń jýrnalıstıka fakýltetinde oqı júrip, eńbekke aralasty. 1984-1998 jyldary Qazaq radıosynyń Balalar men jastar redaktsııasynda tilshi, Balalar men jastar redaktsııasynyń bas redaktory boldy. Sol kezeńde balalar men jasóspirimderge arnalǵan birqatar tanymdyq, stýdentter men jastardyń ómirine qatysty taǵylymdyq baǵdarlamalardy dúnıege ákeldi. Balalarǵa arnalǵan áńgimeleri, ulttyq máselelerge qatysty maqalalary «Jas Alash», «Ana tili», «Órken», «Ulan» gazetterinde, «Baldyrǵan», «Aıgólek», «Móldir bulaq» jýrnaldarynda jarııalanyp, bastaýysh synyp oqýshylaryna arnalǵan oqý quraldaryna endi.
Jazýshy ómirden ozǵan soń 2000 jyly «Meıirbektiń kógershini» atty tuńǵysh áńgimeler jınaǵy jaryq kórdi. Aramyzda júrgende ol bıyl 65 jasqa tolar edi.
Ómirden ótse de, shynaıy qalamger eshqashan umytylmaıdy. «Ózi ómirden ótken soń, araǵa kóp jyl salyp kitaby jaryq kórgen jazýshy – naǵyz jazýshy» degen de sóz bar.
«Atamura» korporatsııasynyń prezıdenti, baspager-ǵalym, Qazaqstannyń eńbek sińirgen qaıratkeri Raqymǵalı Abraruly Qul-Muhammedtiń demeýshiligimen Baqyt Dosymovtyń «Meıirbektiń kógershini» atty kitaby 500 danamen qaıta jaryq kórdi. Kitapqa jazýshynyń irili-usaqty 23 áńgimesi engen. Bul áńgimelerdiń barlyǵy kezinde jas oqyrmandardyń júreginen oryn alǵan.
Halyqaralyq «Alash» ádebı syılyǵynyń laýreaty, aqyn Bolat Úsenbaev kitapqa jazǵan alǵysózinde «Baqyt – balalar ádebıetiniń qorjynyna olja salǵan qalamger. Jazýshy ózi ómir súrgen dáýirge ǵana emes, bolashaqqa da qyzmet etedi» degen eken. Shynynda da, Baqyt Dosymov shyǵarmalarynyń ekinshi ómiri bastalyp ketken sııaqty.
