Bakınskıı teńiz porty Quryq portymen áriptestikke daıyn

ASTANA. QazAqparat - Quryq portyndaǵy paromdyq keshenniń qurylysy aıaqtalýyn Ázerbaıjan da kútip otyr. Bul týraly Qazaqstan Premer-Mınıstriniń Mańǵystaý oblysyna jumys sapary aıasynda ótken basqosýda «Bakınskıı teńiz saýda porty» JAQ bas dırektory Taleh Zııadov málimdedi, dep habarlaıdy «Qazaqstan temir joly» UK» AQ baspasóz qyzmeti.

Óz sózinde Taleh Zııadov eki eldiń ekonomıkalyq damýy men jalpy aımaqtyń múddesi jolynda Aqtaý portymen kóp jylǵy áriptestiktiń mańyzdylyǵyn atap ótti.

«Bizdiń Aqtaý portynda bolǵanyma men óte qýanyshtymyn. Men bul portty «bizdiń» dep ataýymnyń sebebi, biz Aqtaýmen óte jaqynbyz»,- dedi Bakınskıı portynyń jetekshisi.

Aqtaý jáne Baký porttary arasynda turaqty paromdy qatynas ornaǵan. Temir jol paromdary munaı ónimderin, halyqtyq tutyný taýarlaryn, astyq pen mıneraldy tyńaıtqyshtar tasymaldap, 253 teńiz mılin 18-20 saǵatta eńserýde. Bul paromdarǵa 54 temir jol vagony men 35 úlken júk avtomobıline deıin syıyp ketýde. Aıyna 1000 birlikke deıin úlken júk tıeletin dońǵalaqty tehnıka óńdeledi eken.

2015 jyldyń qorytyndysynda júk tasymaldaýdyń jalpy kólemi 5 mln 897 myń tonnany quraǵan. Jyldyń alǵashqy jartysynyń qorytyndysy - 2 mln 681 myń tonna.

Jıyn barysynda T.Zııadov, Qytaıdan Eýropaǵa ótetin transkaspıılik dáliz tizbeginde, Quryq portynda salynyp jatqan paromdyq keshenniń mańyzdy oryn alatynyn atap ótti.

«Quryq portyndaǵy paromdyq keshenniń tezirek iske qosylýyn taǵatsyzdana kútip júrmiz», - dedi ol.

 Ázerbaıjandyq  delegatsııa jańa qazaqstandyq aılaqta bolyp, ony damytý josparlarymen tanysty.

Baký portynyń  basshysy Quryq portynyń tynys-tirshiligin órkendetýge barynsha qoldaý kórsetýge  jáne teńiz kóligindegi tasymal qarqyny artqan qazirgi ýaqytta júk tasymalynyń  jyldam ári yńǵaıly bolýy úshin jemisti yntymaqtastyq ornatýǵa daıyn ekendikterin  bildirdi.