Baqylanatyn sheteldik kompanııalarǵa qosymsha salyqtyq tetikter engizilmek

ASTANA. KAZINFORM – 2026 jylǵy 1 qańtardan bastap baqylanatyn sheteldik kompanııalarǵa salyq salý qaǵıdalaryn qosa alǵanda, qosymsha salyqtyq tetikterdi engizý josparlanyp otyr. Bul týraly Májilis depýtattarynyń saýalyna Premer-Mınıstr Oljas Bektenovtiń jaýabynda aıtylǵan.

салық
Фото: freepik.com

- Memleket basshysy 2024 jylǵy 2 qyrkúıektegi Qazaqstan halqyna Joldaýynda aktıvterdi memleketke qaıtarýdyń jáne olardy ulttyq ekonomıkany damytýǵa ınvestıtsııalaýdyń mańyzdylyǵyn atap ótti. Keıinnen ekonomıkaǵa jáne áleýmettik-mádenı jobalarǵa sala otyryp, sondaı-aq qaıtarylǵan aktıvter boıynsha eseptilikti qamtamasyz ete otyryp, aktıvterdi zańsyz dep tanýsyz erikti túrde qaıtarý tetikterin normatıvtik turǵyda bekitýdi tapsyrdy, – dedi Úkimet basshysy.

Onyń atap ótýinshe, Úkimet aktıvterdi erikti túrde qaıtarýdy yntalandyrýǵa, rásimderdiń ashyqtyǵyn qamtamasyz etýge jáne kúmándi qarajatty zańdastyrýdyń jolyn kesýge baǵyttalǵan quqyqtyq jáne ınstıtýtsıonaldyq quraldardy ázirleýdi qosa alǵanda, qoıylǵan mindetterdi iske asyrý sharalaryn qabyldaýda.

- Qazirgi ýaqytta elde sheteldik aktıvterdi erikti túrde deklaratsııalaý tetikteri jumys isteıdi. Olar salyqtyq yntalandyrýlarmen birge júredi. 2024 jyly salyqtyq aqparatpen avtomatty túrde almasý 89 ıýrısdıktsııamen, sonyń ishinde 26 ofshorlyq elmen júzege asyryldy. Ekonomıkalyq yntymaqtastyq jáne damý uıymy ázirlegen bul tetik ózin kapıtaldy zańsyz shyǵarýǵa qarsy kúreste tıimdi qural retinde kórsetti jáne shetelde aktıvteri bar qazaqstandyqtardyń kiristerinen túsetin salyqtardy ákimshilendirýge yqpal etedi. 2026 jylǵy 1 qańtardan bastap baqylanatyn sheteldik kompanııalarǵa salyq salý qaǵıdalaryn qosa alǵanda, qosymsha salyqtyq tetikterdi engizý josparlanýda. Bul aktıvterdi odan ári qaıtarýǵa jáne halyqaralyq qarjy operatsııalarynyń ashyqtyǵyn nyǵaıtýǵa jaǵdaı jasaıdy, - dedi Oljas Bektenov.

Buǵan deıin Májilis Salyq kodeksi men oǵan ilespe zańdy qabyldaǵan edi.

Сейчас читают