Baqdáýlet Sábıtov BQO dene shynyqtyrý jáne sport basqarmasyn basqarady

ORAL. KAZINFORM – Baqdáýlet Maratuly Sábıtov BQO dene shynyqtyrý jáne sport basqarmasynyń basshysy bolyp taǵaıyndaldy.

Basqarmadan alynǵan málimetke qaraǵanda, Baqdáýlet Maratuly 1992 jyly 6 sáýirde Túrkistan oblysy, Tóle bı aýdanynda dúnıege kelgen.

L.N.Gýmılev atyndaǵy EUÝ-de kólik, kólik tehnıkasy jáne tehnologııalary mamandyǵy boıynsha bilim alǵan (2010-2014). Shymkent ýnıversıtetinde dene shynyqtyrý jáne sport mamandyǵyna oqyǵan (2016-2018). Dene shynyqtyrý jáne buqaralyq sport akademııasynyń EMBA sport menedjmenti magıstri (2024-2025).

Qazaq kúresinen halyqaralyq dárejedegi sport sheberi. Dzıýdodan sport sheberi.

QR Qazaq kúresi federatsııasynda basshylyq qyzmet atqarǵan.

2022 jyldyń sáýir aıynan bastap 2025 jyldyń qańtaryna deıin QR Týrızm jáne sport mınıstrligi «Ulttyq jáne at sporty túrleri ortalyǵy» RMQK dırektory boldy.

Jańa basshyny ujymǵa BQO ákiminiń orynbasary Baqytjan Narymbetov tanystyryp, qyzmetine sáttilik tiledi.

Eske sala keteıik, budan buryn óńirlik sport basqarmasy basshylary mınıstrlik komıssııasy sheshimimen taǵaıyndalatynyn jazǵan bolatynbyz.