Baqaýov medıtsına salasynda jaǵdaıy tómen stýdentterdi bıýdjet esebinen oqytýdy tapsyrdy

Aımaq basshysy mundaı pikirdi jastar saıasaty jáne patrıottyq tárbıe jónindegi keńestiń otyrysynda bildirdi, dep habarlaıdy pavlodarnews.kz .

  «Stýdent nemese onyń otbasy ómirde qıyn jaǵdaıǵa tap bolatyn sátter oryn alady. Sondyqtan keıde oqýyn tastap ketýge májbúr bolady», -  deıdi oblys ákimi.»Mundaı jaǵdaıda bıýdjet esebinen oqý aqysyn tóleýdi usyna alamyz. Degenmen ýnıversıtetti aıaqtaǵannan keıin jas maman bizdiń óńirge kelip, kem degende bes jyl eńbek etýi tıis. Biz osylaısha 4-5 jyldyń ishinde oqyǵan dárigerdi tarta alamyz. Bul úshin árbir aýdan men qalanyń basshylary qandaı mamandardyń jetispeıtinin anyqtap, bıýdjette qajet resýrs qarastyrýy tıis».

 Bolat Baqaýov kásibı baǵdarlaý jumystaryn júrgizý úshin Semeı memlekettik medıtsınalyq ýnıversıtetine baryp kelýdi usyndy. Budan basqa, aldaǵy ýaqytta jergilikti qazyna esebinen oqytylatyn mamandyqtardy tizimge engizý tapsyryldy. Sonymen qatar, kezdesý barysynda pavlodarlyq kolledjderi túlekteriniń  eńbekpen qamtylýy týraly sóz qozǵaldy. Belgili bolǵandaı, 1 qyrkúıek kúni olardyń 99,1 paıyzy jumysqa kirisken, joǵary oqý ornyna túsken nemese ásker qataryna Otan aldyndaǵy boryshyn óteýge attanǵan. Qalǵan 45 adam jumys izdep júr. Olardyń altaýy - «Aqparattyq júıe», «Sút ónimderin shyǵarý», «Azyq-túlik ónimderin shyǵarýdy uıymdastyrý tehnologııasy», «Tústi metaldar metallýrgııasy», «Emdeý jáne medbıbi isi» jáne basqa da mamandyqtar ıesi.

Bilim berý basqarmasynyń basshysy Baqyt Bekseıitovanyń aıtýynsha, olardyń árqaısysymen jeke jumys júrgizilgen.